«Astana» shabandozy Matteo Malýchellı Japonııadaǵy kópkúndikti jeńispen bastady
ASTANA. KAZINFORM — Japonııada «Týr Kıýsıý» kópkúndik velojarysy bastaldy. Fýkýokada márege jetken alǵashqy kezeń jappaı sprıntpen aıaqtalyp, onda XDS Astana Team komandasynyń shabandozy Matteo Malýchellı jeńiske jetti.
Alǵashqy kezeńniń qashyqtyǵy 152 shaqyrym boldy. Sheshýshi sprıntte Malýchellı Jańa Zelandııa ókili, Li Ning Star komandasynyń shabandozy Lıýk Madgveıdi basyp ozdy.
Úshinshi bolyp Qazaqstan quramasynyń taǵy bir ókili — XDS Astana Development Team shabandozy Alessıo Delle Vedove márege jetti. Komandanyń stajeri Nıkıforos Arvanıtý toǵyzynshy oryn aldy.
Matteo Malýchellı jarys kúni ońaı bolmaǵanyn, alaıda komandanyń jaqsy jumys istegenin aıtty.
— Búgin birshama qıyn boldy, biraq komanda keremet óner kórsetti. Biz jappaı sprıntke shyǵýdyń jalǵyz múmkindigi osy kezeńde bolatynyn bildik, sondyqtan oǵan erekshe daıyndaldyq. Márege jaqyndaǵanda aldyńǵy qatarda bolý, ásirese sońǵy burylystan alǵashqy bolyp ótý mańyzdy edi. Bári oıdaǵydaı boldy. Sońǵy burylystan alǵashqy úshtiktiń qatarynda óttim. Sodan keıin Nıkı Arvanıtý meni márege deıin jaqsy bastap bardy. Maǵan tek sprıntti sátti aıaqtap, jeńiske jetý ǵana qaldy, — dedi ol klýbtyń baspasóz qyzmetine bergen suhbatynda.
Italııalyq shabandoz bul bıylǵy maýsymdaǵy toǵyzynshy jeńisi ekenin aıtty.
— Jalpy, bul jyl sátti ótti dep oılaımyn. Qolymnan kelgenniń bárin jasadym. Alda jalpy esep úshin kúresetin taǵy eki kún bar. Komanda bar kúshin salady, sondyqtan nátıjesin kóre jatarmyz, — dep qosty veloshabandoz.
Birinshi kezeńnen keıin Matteo Malýchellı «Týr Kıýsıý» jarysynyń jalpy esebinde kósh bastady. Sondaı-aq ol upaılar boıynsha da birinshi orynǵa shyqty. Alessıo Delle Vedove jastar arasyndaǵy esepte birinshi orynǵa shyqty.
Eske salaıyq, buǵan deıin Malýchellı Malaızııada ótken bedeldi «Týr Langkavı» kópkúndik velojarysynda da tabysty óner kórsetip, segiz kezeńniń úsheýinde jeńiske jetken edi.
