«Astana» shabandozdary Ispanııadaǵy jarysta birinshi jáne úshinshi oryndy ıelendi
ASTANA. KAZINFORM — XDS Astana Team komandasynyń shabandozy Tomas Sılva Ispanııada kezekti jeńisine qol jetkizip, bir kúndik «Kastılııa ı Leon klassıkasy» jarysynda top jardy. Al onyń komandalasy Krıstıan Skaronı úshinshi oryn aldy.
190,6 shaqyrymǵa sozylǵan jarys Benaventeden Lýbıanaǵa deıingi baǵytta ótti. XDS Astana Team ókilderi jarys boıy kóshbasshylyqty baqylaýda ustap, sońǵy taýǵa kóterilý kezinde sheshýshi shabýyl jasaýǵa qolaıly jaǵdaı qalyptastyrdy.
Jarystyń sońyna qaraı Krıstıan Skaronı men Tomas Sılva qarsylastaryna kezek-kezek qysym kórsetti. Máre syzyǵyna 100 metr qalǵanda Sılva sheshýshi shabýyl jasap, 4 saǵat 23 mınýt 41 sekýnd nátıjesimen birinshi bolyp márege jetti. Ekinshi oryndy Movistar Team komandasynyń ıspanııalyq shabandozy Rodjer Adrıa ıelense, Skaronı jarysty úshinshi bolyp aıaqtady.
— Bul — eki kúndegi ekinshi jeńisim, sondyqtan óte qýanyshtymyn. Eń aldymen, búgin komandanyń keremet jumysyna toqtalǵym keledi. Jigitter orasan zor jumys atqaryp, Krıstıanǵa, Dıegoǵa jáne maǵan sońǵy taýǵa kóterilý kezinde jeńis úshin kúresýge barlyq múmkindik jasady. Biz taktıkamyzdy minsiz júzege asyrdyq. Búkil komandanyń tamasha eńbegin jeńispen aıaqtaǵanyma jáne Skaronıdiń úshinshi oryn alǵanyna óte qýanyshtymyn. Biz birge jarysqanda ózimizdi óte jaqsy sezinemiz. Osy baǵytta ári qaraı da jumys isteı beremiz dep úmittenemin, — dedi Tomas Sılvanyń sózin komandanyń baspasóz qyzmeti keltirdi.
Aıta keteıik, «Astana» veloshabandozy «Djıro d’Italııada» úshinshi ret júldeger atandy.
