Astana – Semeı poıyzynda áıelder vagony bolady: alǵashqy reıs 13 qarashada

ASTANA. KAZINFORM — Astana men Semeı arasynda qatynaıtyn jańa Stadler poıyzdarynda áıelderge arnalǵan vagon qyzmeti saqtalady. Alǵashqy reıs 13 qarashaǵa josparlanǵan. Bul vagonǵa bıletter tek áıelderge satylady, al jeti jasqa deıingi ul balalar anasymen birge júre alady.

Astana – Semeı poıyzynda áıelder vagony bolady: alǵashqy reıs 13 qarashada
Foto: «Jolaýshylar tasymaly» AQ baspasóz qyzmeti

«Jolaýshylar tasymaly» AQ № 153/154 «Nurly jol — Semeı» baǵyty boıynsha qatynaıtyn jańa Stadler poıyzdarynda áıelder vagony qyzmeti saqtalǵanyn habarlady. Jańa poıyzdyń elordadan Semeı qalasyna alǵashqy sapary 2026 jylǵy 13 qarashaǵa josparlanǵan.

Áıelderge arnalǵan vagon jolaýshylardyń sapar kezindegi jaılylyǵy arttyrýǵa baǵyttalǵan. Bul vagondarǵa bıletter tek áıelderge satylady jáne jolaýshylarǵa tek áıel jolserikter qyzmet kórsetedi.

Sonymen qatar, áıelder vagonynda jeti jasqa deıingi ul balalardyń júrýine ruqsat etiledi.

áıelder vagony
Foto: «Jolaýshylar tasymaly» AQ baspasóz qyzmeti

Áıelder vagonyndaǵy bılet baǵasy osy sanattaǵy basqa vagondardyń bılet qunymen birdeı.

Bıletterdi bilet.railways.kz resmı saıtynan nemese temirjol vokzaldarynyń kassalarynan satyp alýǵa bolady. Onlaın bılet satyp alý kezinde áıelder vagony «JN» belgisimen kórsetiledi.

«Jolaýshylar tasymaly» AQ jolaýshylarǵa kórsetiletin qyzmet sapasyn arttyrý, suranysqa ıe servısterdi damytý jáne temirjol kóliginde qaýipsiz ári jaıly sapar jaǵdaılaryn jasaý baǵytyndaǵy jumysyn jalǵastyrady.  Qosymsha aqparatty 1433 tegin baılanys nómiri arqyly alýǵa bolady.

Aıta keteıik, jańa poıyzdarǵa bılet kesheden bastap satylyp jatyr.