Astana – Semeı - Dostyq poıyzynda spýtnıktik ınternet iske qosyldy
ASTANA. KAZINFORM – «Araı trans KZ» kompanııasynyń Astana – Semeı – Dostyq baǵytyndaǵy №121/122 poıyzynda Starlink tehnologııasy boıynsha spýtnıktik ınternet qosyldy. Bul — ınternet jelisine qosylǵan jeke tasymaldaýshylar qyzmet kórsetetin alǵashqy baǵyt.
Joba Kólik mınıstrliginiń zamanaýı tsıfrlyq sheshimderdi engizý jáne jolaýshylar tasymalynyń sapasyn arttyrý boıynsha jumysy aıasynda júzege asyryldy.
Tehnologııany engizý Qazaqstandaǵy temirjol tasymaldaýshylarynyń tsıfrlyq jáne telekommýnıkatsııalyq sheshimder salasyndaǵy kópjyldyq seriktesi – Kaztechnology ınjenerlik kompanııasynyń qatysýymen júzege asyryldy.
Kompanııa «Araı trans KZ» JShS-men tyǵyz yntymaqtastyqta Astana – Semeı – Dostyq baǵytyna Starlink spýtnıktik ınternet tehnologııasyn engizýdi qamtamasyz etti. Bul jolaýshylarǵa arnalǵan zamanaýı servısterdi damytý jolyndaǵy kezekti mańyzdy qadam boldy.
Spýtnık baılanysyn paıdalaný buryn uıaly telefon baılanysy bolmaǵan temirjol ýchaskelerinde ınternetke qosylýdy qamtamasyz etedi. Bul jolaýshylarǵa marshrýttyń shalǵaı ýchaskelerinde de baılanysta bolýǵa múmkindik beredi.
Qosylý úshin poıyzdaǵy Wi-Fi jelisin tańdap, avtorızatsııadan ótý qajet. Jolaýshylarǵa qosylýdyń eki nusqasy bar:
- WhatsApp jáne Telegram-da mátindik habar almasý úshin aqysyz qol jetimdilik;
- ınternet-resýrstarǵa, áleýmettik jelilerge, beıne servısterge jáne jumys qosymshalaryna tolyq qoljetimdiligi bar aqyly tarıf. Qyzmetter úshin tólem Kaspi.kz, Halyk, Apple Pay, Google Pay, Visa jáne MasterCard bank kartalary sııaqty yńǵaıly ádister arqyly júzege asyrylady.
- Spýtnıktik ınternetti engizý jolaýshylardyń jaılylyǵyn arttyryp, tsıfrlyq qyzmetterge qoljetimdilikti keńeıtedi jáne temirjol kóligi qyzmetteriniń sapasyn ulǵaıtady. Jolaýshylar tasymalynda zamanaýı tehnologııalardy engizý jáne tsıfrlyq servısterdi damytý jónindegi jumys jalǵasatyn bolady, - delingen Kólik mınıstrligi habarlamasynda.
Buǵan deıin Qazaqstanda aldymen qaı poıyzdarǵa ınternet qosylatynyn jazǵan edik.
