«Astana»-«Seltık» matchy aldynda Astanadaǵy kólik qozǵalysy shekteledi

ASTANA. QazAqparat - 27 shilde kúni keshki 20.00-de «Astana Arena» stadıonynda «Astana» fýtbol klýby shotlandııalyq «Seltık» komandasyna qarsy ÝEFA Chempıondar lıgasynyń úshinshi irikteý raýndynyń qarymta matchyn ótkizedi.

Astanadaǵy jergilikti polıtsııa qyzmetiniń habarlaýynsha, 27 shilde kúni 18:00-den bastap, Qabanbaı batyr-Turan dańǵyldarynyń boıy jáne Kereı-Jánibek handar kóshesinen Hýseın Ben Talal kóshesine deıin kólik qozǵalysy shekteledi.  

«Kólik qozǵalysyn shekteý shara aıaqtalǵansha jalǵasady. Orynbor kóshesimen aınalyp ótýge bolady», - delingen habarlamada.

«Kólik júrgizýshilerin asa saq bolýǵa jáne jeke kólikti úıde qaldyryp, qoǵamdyq kólikti paıdalanýǵa shaqyramyz. Astana halyqaralyq áýejaıy aýmaǵyna barýdy josparlaǵandar men jaqyn aýyl turǵyndaryna aldyn ala basqa baǵyt tańdaýlaryn ótinemiz», - dep habarlady Astana ІІD jergilikti polıtsııa qyzmeti.

Kórermenderge yńǵaıly bolý úshin 18:00-den bastap, myna mekenjaılar boıynsha fýtbol matchy jankúıerlerin jınaý jáne jetkizý qyzmeti oryndalady:

- «Qazaqstan» sport kesheniniń avtoturaǵy (Qajymuqan kóshesi);

- «Haziret Sultan» meshiti (R.Qoshqarbaev dańǵyly);

- «Nur Astana» meshiti (shyǵys jaqtaǵy avtoturaq);

- astanalyq tsırk avtoturaǵy; (Qorǵaljyn tas joly)

- Q.Muńaıtpasov stadıonynyń avtoturaǵy; (Kenesary kóshesi);

Qalaǵa qaıtý úshin «Astana-Arena» Stadıony» avtoturaǵy jáne aıaldamasyna jınalý kerek, Qabanbaı batyr dańǵyly boıynsha kórsetilgen shattldar beriledi.