«Astana -Şýchınsk» tas jolynda júk kólikterine júktemeniń kólemi arttyryldy
ASTANA. 20 maýsym. QazAqparat - QR Kólik jáne kommýnıkatsııa mınıstrligi «Astana-Şýchınsk» tas jolymen ótetin júk kólikteri úshin jalqy bilikke túsetin júktemeni 11,5 tonnaǵa deıin arttyrýdy josparlaýda.
Mundaı sheshim kólikterdiń atalǵan avtomagıstralmen júrip ótkeni úshin aqy engizilýine jáne jol jabyndysynyń joǵary sapalyq sıpattamasyna baılanysty qabyldanyp otyr.
Jalqy bilikke túsetin ruqsat etilgen salmaq kólemin arttyrý tasymaldaýshylarǵa qosymsha tólemaqysyz nemese aıyppulsyz tasymaldaıtyn júk kólemin arttyrýǵa múmkindik beredi.
«Aıtyp ótý kerek, bul úshin qoldanystaǵy zańnamaǵa tıisti ózgertýler engizý qajet. Qazirgi kúni jalpy qoldanystaǵy respýblıka joldarynda avtomobıldiń jalqy biligine ruqsat etilgen júkteme kólemi 10 tonnany quraıdy. Buǵan qosa, kóktemgi jáne jazǵy mezgilderde qosymsha shekteýler engiziledi. Bul shekteýler kóktemde qar sýynyń, al jaz aılarynda joǵary temperatýranyń jol jabyndysyna teris áserin tıgizýine baılanysty engiziledi»,- delingen QR KKM málimetinde.
Avtomobıl joldary komıtetiniń tóraǵasy Zamır Saǵynovtyń aıtýynsha, salynyp jatqan respýblıkalyq mańyzdaǵy joldardyń joǵary sapasyn esepke ala otyryp, bolashaqta qaıtadan paıdalanýǵa berilgen avtojoldarda júk kólikteriniń jalqy biligine túsetin júkteme salmaǵyn 11,5 tonnaǵa arttyrý kózdelýde.
