«Astana - Şýchınsk» kúre jolynda «Meteostansa» júıesi iske qosyldy
ASTANA. QazAqparat - Astana - Şýchınsk kúre jolynda «Meteostansa» qosalqy júıesin engizý júrgizýshilerdi aýa raıy jóninde aldyn ala eskertýge múmkindik beredi.
Bul avtomobıl joldary men jol tóseminiń aýa raıynyń jaǵdaıy jónindegi aqparatty jınaqtap, óńdep, ony basqarýǵa arnalǵan meteorologııalyq jaǵynan qamtamasyz etý avtomattandyrylǵan júıe bolyp tabylady, dep habarlaıdy QR Kólik jáne kommýnıkatsııa mınıstrliginiń baspasóz qyzmeti. Avtomattandyrylǵan jol meteostansasy meteoshamalardyń 30-ǵa jýyq parametrlerin, onyń ishinde, aýa temperatýrasy, salystyrmaly ylǵaldylyq, jaýyn-shashyn túrleri, jeldiń baǵyty men jyldamdyǵyn ólsheıdi.
Al ýchaskedegi qalyptasqan jaǵdaı jóninde júrgizýshilerdi aqparattandyrý jáne eskertý maqsatynda málimetterdi saqtaý serverine onlaın túrinde turaqty qol jetkize alatyn júıe operatory ýaqyt, aýa temperatýrasy, aǵymdaǵy aýa raıy men eń joǵary jyldamdyq jaıyndaǵy 4 parametrdi kórsetetin jaryq dıodtyq tabloǵa qajetti aqparatty shyǵaryp otyrady.
Aıta ketetin jaıt, operator «Genezıs zerthanasy» qazaqstandyq kompanııasy ázirlegen arnaıy mamandyrylǵan baǵdarlamalyq jasaqtamamen jabdyqtalǵan. Baǵdarlama málimetterdi taldap, operatorǵa qajetti usynymdardy shyǵaryp beredi.
Atalǵan meteostansa Astana - Şýchınsk kúre jolynda «Qazaqstanda magıstraldyq zııatkerlik kólik júıelerin jasaý jáne damytý jónindegi 2020 jylǵa deıin jospardy» iske asyrý aıasynda joǵary jyldamdyqty avtomagıstralder men halyqaralyq baǵyttardaǵy trassalarda jol qaýipsizdigin qamtamasyz etý maqsatynda engizilgen.
