«Astana - Şýchınsk» kúre jolyna qosymsha 25 tehnıka satyp alynatyn bolady
ASTANA. 20 maýsym. QazAqparat - Bıylǵy jyly aqyly «Astana - Şýchınsk» kúre jolyn qardan tazalaý, jol belgilerin tańbalaý jáne aǵymdaǵy jóndeýden ótkizip otyrý úshin qosymsha 25 tehnıka satyp alynatyn bolady.
Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.
Avtomobıl joldary komıteti tóraǵasynyń orynbasary Amangeldi Bekovtyń aıtýyna qaraǵanda, bıylǵy jyly qar kóbirek úıiletin ýchaskelerde qartejegish tosqaýyl qalqandar ornatý jáne bolashaqta jol boıyna aǵash otyrǵyzý josparlanýda.
«Astana - Şýchınsk» avtobanynyń 31 mamyrdan bastap kútip ustalýy derbes júrgizile bastady. Atap aıtqanda, magıstraldi, belgiler men tosqaýyl qorshaýlardy jóndeý, jol belgilerin tańbalaý, qoqys pen qardan tazartý jumystary osy jolmen júrip ótýden túsken aqsha esebinen júrgiziledi. Al, bul maqsatqa buryn bıýdjetten bólinip kelgen qarjy óńirdiń basqa joldaryn jóndeýge jumsalatyn bolady.
Avtobandy jyl saıyn kútip ustaý úshin 1,3 mlrd. teńge, onyń ishinde qysqy maýsymda kútip ustaý úshin 528 mlrd. teńge qajet ekendigin atap ótken jón. Ótken qysqy merzimde bıýdjettik qarajattyń shekteýligine jáne jóndeýdi qajet etetin joldardyń kóptigine baılanysty bul avtobandy kútip ustaý úshin nebári 241,4 mln. teńge bólingen bolatyn.
