«Astana-Şýchınsk» avtojoly boıyndaǵy servıstik qyzmet áli de syn kótermeıdi
KÓKShETAÝ. QazAqparat - «Astana-Şýchınsk» tas jolynyń boıyndaǵy servıstik qyzmet áli de talapqa saı emes. Bul týraly Aqmola oblysynyń Kásipkerlik jáne ónerkásip basqarmasy basshysynyń orynbasary Doshan Ámirenov aıtty, dep habarlaıdy QazAqparat tilshisi.
Doshan Ámirenovtyń aıtýynsha, óńirde týrızmdi damytý boıynsha sharalar memlekettik baǵdarlamalardan tys oblys ákimdigi tarapynan da júzege asyrylýda. Ásirese, «Astana-Şýchınsk» avtojoly boıyndaǵy servıstik qyzmet kórsetýdi damytý boıynsha naqtyly sharalar qolǵa alynǵan.
«Respýblıkalyq mańyzy bar «Astana-Şýchınsk» tas jolynyń boıynda servıstik qyzmet kórsetetin 47 nysan bolsa, osy kúni onyń 43-i jumys isteıdi. Onyń 16-y janar-jaǵar maı quıý stansasy, 16 - tamaqtanatyn oryn jáne 11 - servıstik (dárethana jáne saýda núktesi) pavılon», - dedi ol.
Basqarma basshysynyń sózine qaraǵanda, jumys istep turǵan atalmysh 43 nysannyń 29-y ǵana Qazaqstan Respýblıkasynyń «Jalpy qoldanystaǵy avtomobıl joldary. Jol boıyndaǵy servıs jáne onyń qyzmet talaptary» ulttyq standartyna saı keledi. Jyl sońyna deıin taǵy eki nysandy osy standartqa sáıkestendirý josparlanǵan. «Astana-Şýchınsk» tas jolynyń aqyly bóligi «QazAvtoJol» ulttyq kompanııasynyń «Aqyly avtomobıl joldary dırektsııasy» fılıalyna qaraıdy. Aǵymdaǵy jyly bul joldyń boıynda «KazWay» 5 servıstik pavılony ornatyldy.
«Aqmola oblysynyń ákimi Málik Myrzalınniń tapsyrmasymen sanıtarlyq talaptarǵa saı kelmeıtin betonnan turǵyzylǵan 17 dala dárethanasy súrildi. Oǵan qosa, oblystyq jáne aýdandyq jergilikti atqarýshy organdar jol boıynda ornalasqan servıstik qyzmet nysandaryn zerttedi jáne kásipkerlerge qoldanystaǵy zańnama talaptary túsindirdi», - dep tolyqtyrdy D.Ámirenov.
Dárethanasy bar jol boıy servıstik qyzmet kórsetý nysandaryna qatysty problemalarǵa jedel nazar aýdarý úshin oblystyq Kásipkerlik jáne ónerkásip basqarmasynda jedel jeliler jumys isteıdi. Atap aıtqanda, call-ortalyq - 8(7162) 240022, týrıstik aqparattyq ortalyǵy - 8 708 801 0000, aqyly avtomobıl joldary dırektsııasy- 8(7172) 436169.
Osy telefon nómirleri arqyly «Astana-Şýchınsk» tas jolynyń boıyndaǵy servıstik qyzmet nysandarynyń ornalasqan jeri týraly aqparat alýǵa jáne bul nysandarǵa kirgen kezdegi týyndaıtyn problemalardy habarlaýǵa bolady.
Eske sala keteıik, aǵymdaǵy jyldyń maýsym aıynda aımaq basshysy Málik Myrzalınniń qatysýymen «Astana-Býrabaı» tas joly boıynda sanıtarlyq talaptarǵa saı ári qazirgi zamanǵy servıstik qyzmet pavılondarynyń alǵashqysy ornatylǵan bolatyn.
