«Astana-Şýche» jolyna shyqqan mas adamdy kólik qaǵyp ketti
KÓKShETAÝ. QazAqparat - Aqmola oblysynda mas jaıaý adam kóliktiń astyna tústi. Bul týraly oblystyq ІІD baspasóz qyzmetinen habarlady.
Polıtseılerdiń málimeti boıynsha keleńsiz jaǵdaı ótken túni Shortandy aýdanynda oryn aldy. Mas kúıinde avtomagıstraldy ruqsat etilmegen jerinen kesip ótpek bolǵan 26 jastaǵy er adam kóliktiń astyna túsken.
«Shortandy aýdandyq aýrýhanasynyń kezekshi dárigeri 26 jastaǵy er adamnyń mas kúıinde jol apatyna ushyrap, túrli dene jaraqatymen aýrýhanaǵa túskenin habarlaǵan. Keıin belgili bolǵandaı «Astana-Şýche» kúre jolynyń 46 shaqyrymynda atalǵan er adam joldyń ruqsat etilmegen jerinen ekinshi jaq betine júgirip ótpek bolǵan. Osy kezde jol boıymen kele jatqan Býrabaı kentiniń 42 jastaǵy turǵyny tizgindegen «Lada - Largýs» kóliginiń astyna túsken. Kólik júrgizýshisi saý bolǵandyqtan oǵan aıyp taǵylyp otyrǵan joq», dep kórsetilgen habarlamada.
Aıta keteıik, maýsymnyń 1-5 aralyǵynda oblys aýmaǵynda júrgizilip jatqan respýblıkalyq «Qaýipsiz jol» jedel aldyn alý sharasy barysynda 2028 jol qozǵalysy erejesi buzylǵany anyqtaldy. Onyń ishinde alkogoldik ishimdik iship, rólge otyrǵan 59 júrgizýshi ustaldy. 221 ret jyldamdyqty shamadan tys asyrǵan, 492 ret qaýipsizdik belbeýin qoldanbaý, 12 ret joldyń qarsy baǵytyna shyǵý, 232 ret rólde uıaly telefondy qoldaný, 25 ret jaıaý júrginshige jol bermeý oqıǵasy tirkeldi jáne 169 jaıaýǵa aıyppul salyndy.
