«Astana sazy» folklorlyq ansambli Úrimshide ótken halyqaralyq óner festıvaline qatysyp keldi
ASTANA. Tamyzdyń 4-i. QazAqparat - Qytaıdyń Shynjań-Uıǵyr avtonomııalyq aýdanynyń ortalyǵy Úrimshi qalasynda alǵash ret halyqaralyq balalar festıvali ótti. Bul sharaǵa Astana qalasyndaǵy №2 balalar mýzyka mektebiniń «Astana sazy» folklorlyq ansambli baryp, tabysty oraldy, dep habarlaıdy QazAqparat.
Halyqtar dostyǵyn jáne balalar arasyndaǵy mádenı baılanysty nyǵaıtýǵa baǵyttalǵan atalmysh festıvalǵa Qytaıdyń birneshe ansambli qatysty. Sondaı-aq Reseıdiń eki shyǵarmashylyq ujymy, Qazaqstan, Túrkimenstan, Qyrǵyz Respýblıkasy, Úndistan, Pákistan elderinen bir-bir ansambl ónerlerin pash etti.
Kórshiles elderdiń yntymaqtastyǵyn arqaý etken óner merekesine elodalyq balalardyń qatysýyna Qazaqstan Respýblıkasyndaǵy Qytaı Halyq Respýblıkasynyń elshiligi muryndyq bolǵan.
Aıta ketý kerek, Qytaı, Túrikmenstan, Úndistan elderiniń ónerli balalary ulttyq bılerin jurtshylyq nazaryna usyndy. Reseı, Qazaqstan ansamblderi negizinen án aıtýmen erekshelendi. Al kórshiles Qyrǵyz Respýblıkasynyń jas ónerpazdary osy festıvalge arnaıy ózderiniń teatrlandyrylǵan kórinisin daıyndapty. Olar óz elderinde bolǵan saıası-tarıhı mańyzdy oqıǵalardan úzindi kórsetti.
Astanalyq ansambldi №2 balalar mýzyka mektebiniń dırektory Ospan Súleımenuly bastap bardy. Elordalyq ónerli balalar Qurmanǵazynyń «Balbraýn» jáne Nurǵısa Tilendıevtiń «Ata tolǵaýy» kúıin oryndap, qoshemetke bólendi. Sonymen qatar №2 balalar mýzyka mektebiniń ustazy Kárimbek Endibaevtyń «Astana saltanaty» atty kúıin birneshe elden jınalǵan kórermenderdiń nazaryna tartý etti. Jeke oryndaýshylar da án shyrqady.
«Balalardyń kontsertten tys ýaqyttary da tıimdi is-sharalarǵa qatysýymen erekshelendi. Demalys kezinde ortalyq saıabaqty, zoobaqty aralap kórdi. Ásirese, ozyq zamanaýı tehnologııanyń damýyna arnalǵan murajaı balalardyń óte qyzyǵýshylyǵyn týǵyzǵan. Onda áli qoldanysqa enbegen tehnıka túrlerimen, ár túrli «óner» kórsete alatyn robottarmen tanysty. Ónerli balalarǵa qultemirlerden quralǵan orkestr qatty áser etti. Jıyrmadan astam múshesi bar «ónerpaz» orkestrdiń óz dırıjerleri bar. Olardyń oryndaǵan shyǵarmasy ár balany ózine tartyp, qyzyqtyra tústi. Sonymen qatar Qytaı eli ǵaryshty zertteýge óte mán berip otyrǵanyn anyq baıqadyq. Óıtkeni osy murajaıdyń bir qabatyn túgeldeı ǵarysh salasyna arnaǵan. Onda balalar Jershary men Ǵalamshardyń qupııa áleminen mol maǵlumat aldy dep oılaımyn»,- deıdi №2 balalar mýzyka mektebiniń dırektory Ospan Súleımenuly.
Bir aptaǵa sozylǵan óner festıvali mádenı oıyn-saýyq keshterin qamtyǵan baǵdarlamalarmen de qyzyqty ótti.
Elimizdiń atynan barǵan astanalyq balalar qorytyndy Galla-kontsertte de óner kórsetti. Ujym jetekshilerine alǵashqy festıvaldiń halyqtar dostyǵyn bildiretin arnaıy belgisi tabys etildi. Osy sharaǵa qatysqandardyń barlyǵy dıplomǵa ıe boldy.
