Astana saıabaqtarynda jeksenbilik jattyǵýlar bastalady
ASTANA. QazAqparat - 14 mamyr kúni Astanada «Fitness Park Astana» aptalyq jeksenbilik jattyǵýlar maýsymy bastalady, dep habarlaıdy Astana qalasynyń Mádenıet, muraǵattar jáne qujattama basqarmasy.
Atalǵan shara ashyq aspan astynda jappaı jattyǵýlar ótetin «Outdoor Sport Area» formatynda bolady. Qalanyń úzdik fıtnes-jattyqtyrýshylary tegin jattyǵý sabaqtaryn júrgizedi. Alańqaıda crossFit, zumba, brazılııalyq djıý-djıtsý, combat battle jáne ıoga sporttyq baǵyttary boıynsha 5 aýmaq jasaqtalady. Alǵashqy jattyǵý Astana saıabaǵynda ótedi.
21 mamyrdan bastap «Jeruıyq» saıabaǵynda crossFit elementterimen, zumba jáne dástúrli djıý-djıtsý boıynsha bir saǵattyq jappaı jatyǵý júrgiziledi. «Stýdenttik» saıabaqta atalǵan baǵyttardan bólek, taı boksy boıynsha jattyǵýlar ótedi.
Jattyǵýlar jaz boıy ár jeksenbi saıyn qalanyń «Astanalyq», «Stýdenttik» jáne «Jeruıyq» saıabaqtarynda tańǵy 10:00-den 13:00-ge deıin ótip turady. «Fitness Park Astana» jappaı sporttyq sharasy halyqtyń salamatty ómir saltyna degen qyzyǵýshylyǵyn oıatý maqsatynda osymen ekinshi jyl qatarynan ótkeli tur.
