Astana saıabaǵynyń ákimshiligi 120 jyldyq terektiń taǵdyryn aıtyp berdi
ASTANA. QazAqparat - Qorshaýdyń syrtynda qalǵan Astananyń eń kári aǵashy Ortalyq saıabaqqa kelýshilerdiń nazaryna ilikpeıdi. 120 jyldyq tarıhy bar kári terektiń taǵdyryn QazAqparatqa saıabaq ákimshiligi aıtyp berdi.
Ákimshiliktiń dereginshe, bul jaıt Esil ózeniniń jaǵalaýyna 15 mınýttyq lazerlik mýzykalyq shoýdyń demeýimen atqylaıtyn sýburqaqty ornatýmen baılanysty oryn alǵan.
«Atalǵan sýburqaqty basqarý úshin belgili bir qurylys salyndy. Olarda elektr qalqan aspaptary, sorǵysh jáne basqa da qurylǵylar ornalasqan. Olardyń bárin qorǵaý úshin arnaıy qorshaý jasaldy. Ókinishke oraı, atalǵan aımaq tolyqtaı qorshaýǵa alynýy qajet bolǵandyqtan terek te sol qorshaýdyń ishinde qalyp qoıdy. Endigi ýaqytta biz osy syrtynan ǵana baqylaı alamyz», - dedi elordalyq saıabaqtyń bólim jetekshisi Irına Maslenko.
Aıta keterligi, 120 jyldyq terek kópes Kýbrın osy qala turǵan kezinde otyrǵyzylǵany belgili. Sondyqtan da elordanyń saıabaǵy uzaq ýaqyt boıy kýbrın saıabaǵy dep atalyp kelgen bolatyn. Saıabaq qurylǵannan bastap osy kúnge deıin osy jalǵyz terek qana aman qalǵan. Ol aıta qoıarlyqtaı kútip-baptaýdy qajet etpeıdi. Tek qýrap qalǵan butaqtaryn kesip tastap otyrsa bolǵany.
Irına Maslenkonyń aıtýynsha, keleshekte sýburqaqty basqarý júıesi qaıta jańǵyrtylyp, basqa jerge kóshiriletin bolady. Sol kezde terek qorshaýdan bosaıdy jáne onyń janyna terektiń tarıhı jazylǵan arnaıy taqtaısha ornatylady.
«Saıabaqta 1995 jyldan beri jumys isteımin. Osy jerde dál osyndaı taǵy eki terek bar edi. Biraq olar sýǵa jaqyn bolǵandyqtan shirip qulaýǵa jaqyn qalǵan bolatyn. Jaǵalaýdy qaıta jańǵyrtý, jaǵajaıdy jabdyqtaý barysynda olardy kesýge týra keldi», - dedi ol.
