Astana saýda ortalyqtarynda tártip buzylsa, ol eki aıǵa Ashyq júıesinen shyǵarylady
Epıdemıologııalyq ahýalǵa baılanysty bıznes sýbektileriniń jumysy Nur-Sultan qalasy kásipkerler palatasynyń, sanıtarlyq-epıdemıologııalyq baqylaý departamentiniń, elorda ákimdigi basshylyǵynyń, sondaı-aq SOO jáne basqa ókilderiniń qatysýymen zoom-konferentsııasynda talqylandy.
Nur-Sultan qalasy kásipkerler palatasynyń dırektory Almat Júnisov buǵan deıin «Atamaken» QR UKP Ashyq qosymshasyn barlyq jerge engizý sekildi bıznes jumysynyń birneshe nusqasyn Úkimetke usynǵanyn atap ótti.
Qazirgi ýaqytta SOO jáne SÚ atalmysh jobaǵa óz erkimen qatysady.
Óz kezeginde SOO jáne SÚ ıeleri Ashyq aıasynda jumys algorıtmin qamtamasyz etýge qyzyǵýshylyq tanytady.
«Biz SOO men SÚ koronavırýs ınfektsııasynyń taralý qaýpi joǵary ári adam kóp jınalatyn oryn ekenin bilemiz. Osy sebepti saýda ǵımarattarynyń qaýipsiz jumys isteýi úshin, sol sııaqty qalanyń tynys-tirshiligin saqtaý úshin osy qyzmet túrin jobaǵa qosý qajet dep sanaımyz», - dedi Almat Júnisov.
Ol sondaı-aq SOO jáne SÚ ıelerine qosymshany tıisti deńgeıde paıdalanbaǵany, kelýshini tirkemegeni úshin jobadan eki apta merzimge, qaıtalanǵan jaǵdaıda eki aıǵa shyǵarylatynyn eskertti.
Ashyq jobasynan shyǵarý nysannyń jumys ýaqytyn edáýir qysqartady.
Óz kezeginde sanıtarlyq-epıdemıologııalyq baqylaý departamenti dırektorynyń orynbasary Aıgúl Shaǵaltaeva elordada sońǵy aptada koronavırýs ınfektsııasyn kún saıyn 1200-1500 adam juqtyratynyn jetkizdi.
Sońǵy aptada 9934 COVID-19 oqıǵasy tirkeldi, bul aldyńǵy aptadan 37,5% joǵary. Ol KVI taralatyn negizgi oryndar - adam kóp jınalatyn mekemeler, ásirese SOO ekenin aıtyp ótti.
«Ashyq qosymshasynyń arqasynda kúnine 200-ge jýyq adam úı karantınin buzatyny anyqtalady. PTR testi oń nátıje kórsetkenin bile otyryp, adam kóp jınalatyn jerge barýyn toqtatpaı otyr. Bul juqtyrý qaýpi óte joǵary ekenin bildiredi. Qazir karantındi qatańdatý máselesi qaralýda. Biz ShOB sýbektileriniń jumys kestesi men rejımine qosymsha ózgerister engizýdi usynyp otyrmyz. Bárin sanıtarlyq normalardy qatań saqtaýǵa shaqyramyn», – dedi Aıgúl Shaǵaltaeva.
Kezdesýge qatysqan kásipkerler Ashyq jobasy sheńberindegi jumys algorıtmin saqtaýǵa, SOO jáne basqa barlyq kirý/shyǵý tustarynda kelýshilerdi baqylaýdy qamtamasyz etýge daıyn ekenin jetkizdi.
