Astana Sammıti barysynda ınternet arqyly otandyq arnalardy qaraǵan sheteldikterdiń sany kóp boldy - A. Jumaǵalıev
ASTANA. 10 jeltoqsan. QazAqparat /Qanat Mámetqazyuly/ -Astana Sammıti barysynda ınternet arqyly otandyq arnalardy qaraǵan sheteldikterdiń sany kóp boldy. Búgin QR Parlamenti Cenatynyń jalpy otyrysynda «Qazaqstan Respýblıkasynyń keıbir zańnamalyq aktilerine baılanys máseleleri boıynsha tolyqtyrýlar engizý týraly» zań jobasyn talqylaý barysynda Baılanys jáne aqparat mınıstri Asqar Jumaǵalıev osylaı málim etti.
«Búgingi kúni biz barlyq otandyq BAQ-ty ǵalamtorǵa shoǵyrlandyrdyq. Otandyq arnalardy ınternet arqyly «Baq.kz» saıtynan qaraýǵa bolady. Bul sharany da Qazaqstandy álemge tanymal etýdiń bir ádisi dep te ataýǵa bolady. Máselen, EQYU-nyń Astana Sammıti barysynda aıtýly sharany dál osyndaı agregattan sheteldikter tamashalaǵan»,- dedi A. Jumaǵalıev.
Sonymen qatar, Qazaqstandy shetelge tanytýdyń keń sharalaryna toqtalǵan mınıstr, búgingi kúni «Kaspıonet» jerseriktik arnasyn kóptegen memleketterge taratý strategııasy qabyldanǵanyn jetkizdi. Onyń aıtýynsha, dál osyndaı arna «ORT-Eýrazııa» da shetelge habar taratý baǵytyn ustanatyn bolady.
Talqylaý barysynda Senat Tóraǵasy Qasym-Jomart Toqaev jas mınıstrliktiń umtylysyn jaqsy baǵalaı kele, áli de bolsa otandyq telehabardyń mazmunymen jumys isteı túsý qajettigin atap ótti. «Shynan aıtý kerek, kópshilik kórermenniń reseılik habarǵa aýysyp jatatyny ras. Bizdiń telearnalarymyz kóbinese «kóshirgennen» asa almaı júr. Bul rette «kóshirmeniń» túpnusqadan áldeqaıda nashar shyǵatynyn eskerý qajet», - dedi Senat Tóraǵasy.
