Astana Salıdat Qaıyrbekovany sońǵy saparǵa shyǵaryp saldy (FOTO)
ASTANA. QazAqparat - Astana halqy Qazaqstannyń burynǵy densaýlyq saqtaý mınıstri, «University Medical Center» korporatıvti qorynyń tóraıymy Salıdat Qaıyrbekovamen qoshtasty.
Qaraly rásimge Astananyń medıtsına salasynyń qaýymy, Úkimet jáne Parlament músheleri, marqumnyń týystary men dostary keldi. S.Zekenqyzymen qoshtasýǵa nıet bildirgen halyq «Ulttyq ǵylymı kardıohırýrgııa ortalyǵy» AQ konferents zalyna syımaı ketti.
«Ol árıne, óz isiniń sheberi jáne óte jaqsy áriptes boldy. Kún-tún demeı demalyssyz jumys istep, ózin eńbekke arnaǵan jan. Bilimdi edi, jańa tehnologııalardy bilýge qumartty. Myna ortalyq S.Zekenqynyń qatysýymen salynǵan bolatyn. Onyń ómirden erte ótkeni ókinishti. Otbasyna qaıǵyryp, kóńil aıtamyz», - dedi Astana qalasynyń ákimi Áset Isekeshev.
Respýblıkalyq transplantatsııa ortalyǵynyń jetekshisi Jaqsylyq Dosqalıev Salıdat Qaıyrbekovanyń óte jaýapty ekenin aıtty. «Ol Qazaqstannyń densaýlyq saqtaý júıesine tuńǵysh ret lıtsenzııalaýdy, akkedıtatsııalaýdy, attestatsııalaýdy engizdi. Úkimettik emes uıymdardaǵy densaýlyq saqtaý jumystarynyń damýy týraly doktorlyq jumysy «Salamatty Qazaqstan» memlekettik baǵdarlamasynyń negizi boldy», dep atap ótti ol.
S.Qaıyrbekovany jerleý rásimi 2016 jyly 5 shildede, saǵat 11.00-de Qaraǵandy oblysy Kıevka aýylynda ótedi. 
