Astana run-2024: Elorda tórinde kóktemniń alǵashqy jarysy ótti
ASTANA. KAZINFORM – Elorda tórindegi «Trıatlon» saıabaǵynda 5 shaqyrymdy quraǵan maýsymnyń alǵashqy jarysy ótti. 2024 jyly dalada birinshi ret uıymdastyrylǵan týrnırde 500-den astam áýesqoı jelaıaq bas qosty.
Astana qalalyq sport basqarmasy málim etkendeı, «Astana run — 4 kezeńnen turatyn ári qalanyń túrli jerinde ótetin erekshe saıys.
«Dástúrli básekemizdiń ár kezeńinde shamamen 30% qatysýshy birinshi ret qatysady. Olar tek júgirip qana qoımaı, hobbıi sáıkes adamdarmen tanysyp, qalaǵa tez sińisýge múmkindikti arttyrady», — deıdi jarys uıymdastyrýshy Janat Qojahmetov.
Júgirýdi jany súıetin áýesqoı jelaıaqtar jyldyń 4 mezgilinde júgirip, ár kezeńde qalanyń sánine aınalǵan ǵımarattary, sáýletteri beınelengen medaldy ıelenedi.
«Búgingi kún — júgirý úshin óte qolaıly sát. Kúnniń salqyndyǵy artyq terlemeýge, ýaqyt kórsetkishin jaqsartýǵa múmkindik beredi. Densaýlyq — zor baılyq. Aýyrmaý úshin, otbasymyzben salaýatty ómir saltyn ustanamyz. Uıymdastyrýshylardyń balalarǵa arnalǵan qashyqtyqtyqty qamtyǵany jaqsy boldy. Nátıjesinde bastaýyshta oqıtyn Gleb atty ulym birneshe ret júgirip, boıyndaǵy shydamdylyq, qaısarlyq, tártip syndy qasıetterin arttyryp jatyr», — dep Lılııa atty qatysýshy jarystyń artyqshylyqtaryn aıta ketti.
Jarys barysynda eresekter 18-29, 30-39, 40-49, 50-59, 60 jastan joǵary sanatta jeńimpazdardy anyqtasa, 3-9 jas aralyǵyndaǵy balalar 400 metr, 10-17 jastaǵy jasóspirimder 1 shaqyrymǵa júgirdi.
«2019 jyldan keıingi resmı alǵashqy jarysym. Salystyrmaly túrde júgirý sońǵy kezde trendke aınaldy. Alaıda osyndaı úrdis mono qalalarda da jalǵasyn tapsa eken deımin. Sebebi, kishi qalalarda áli de júgirý, velosıped aıdaýdy áli salaýatty ómirdiń bir bólshegi retinde tolyqqandy sanamaıdy», — dedi Asyl atty qatysýshy.
Qys boıy jattyǵý zalynda daıyndalǵan jelaıaqtar úshin bul alǵashqy jattyǵý dese bolady. Óıtkeni, 28 sáýir kúni Birlik kúnine oraı, 10, 21 shaqyrymdy quraıtyn uzaq qashyqtyqtar da qosylatyn bolady.
