«Astana rýhy – uıym bolashaǵynyń sony baǵyty» - respýblıkalyq basylymdarǵa sholý

Keshe úsh kúnge sozylǵan Eýropadaǵy qaýipsizdik jáne yntymaqtastyq uıymynyń Astana sammıti aıasynda ótken Sholý konferentsııasynyń úshinshi bóligi óz jumysyn tabysty aıaqtady. Osyǵan oraı jaryq kórgen «Egemen Qazaqstan» gazetiniń búgingi nómiri 1-2 jeltoqsan kúnderi elordamyz - Astanada ótetin EQYU sammıtine arnalyp otyr. «Astananyń álemdik tolǵaǵy» degen ortaq taqyryp aıasyna toptastyrylǵan maqalalarda konferentsııa jumysy tyńǵylyqty baıandalady. Máselen, «Astana rýhy - uıym bolashaǵynyń sony baǵyty» degen taqyryppen jaryq kórgen maqalaǵa keshe Beıbitshilik jáne kelisim saraıynda ótken EQYU-nyń Astana Sammıti qarsańyndaǵy Sholý konferentsııasynyń keńeıtilgen qorytyndy plenarlyq otyrysyna arnalǵan. Otyrysqa EQYU-nyń Іs basyndaǵy tóraǵasynyń arnaıy ókili- QR Syrtqy ister mınıstriniń orynbasary Konstantın Jıgalov tóraǵalyq etti. Keńeıtilgen otyrysqa EQYU-nyń Bas hatshysy M.P. de Brıshambo qatysty. «Sóz jáne baspasóz bostandyǵyna baılanysty baıandama jasaǵan Slovenııa ókili Anna Petrıch pen BAQ bostandyǵy máseleleri jónindegi EQYU-nyń ókili Dýnıa Mııatovıch Uıym aıasynda bul kókeıkesti máseleniń erekshe mańyzdy oryn alatyndyǵyn tilge tıek etti. Máselen, Dýnıa Mııatovıch óz sózinde EQYU Sammıtinen keıin Uıymǵa múshe memleketter BAQ bostandyǵy sheńberinde qabyldaǵan óz mindettemelerin qaıta jandandyryp, jańa serpilis jasaýlary qajet ekendigin málimdedi. Osy rette ol sóz jáne baspasóz bostandyǵyn odan ári jańǵyrtý maqsatynda 10 negizgi baǵyttardan turatyn basty tujyrymdardy atap kórsetti», - dep jazady basylym.

Keshe Eýropadaǵy qaýipsizdik jáne yntymaqtastyq uıymynyń Sholý konferentsııasy aıaqtalǵan soń, EQYU-nyń Bas hatshysy Mark Perren de Brıshambo men EQYU-nyń Іs basyndaǵy tóraǵasynyń arnaıy ókili, QR Syrtqy ister mınıstriniń orynbasary Konstantın Jıgalov Sholý konferentsııasynyń qorytyndysyna arnalǵan baspasóz máslıhatyn ótkizdi. Osyǵan oraı «Egemen Qazaqstan» gazetiniń búgingi sanynda «Josparlanǵan is-sharalar tolyq júzege asyryldy» degen taqyryppen maqala basyldy.

«Sholý konferentsııalarynyń asa tıimdiligi, oǵan azamattyq qoǵam ınstıtýttarynyń, úkimettik emes uıymdardyń ókilderi de qatysyp, usynystaryn ashyq bildiredi. EQYU - biregeı halyqaralyq Uıym bolǵandyqtan, onyń jıyndarynda memlekettik basqarýdyń tıimdiligin arttyrýǵa, qarý-jaraqqa baqylaý jasaýǵa, basqa da ótkir máselelerge baılanysty máseleler qarastyrylady. Al Qazaqstan EQYU-nyń Astanadaǵy Sholý konferentsııasyna kóptegen úkimettik emes uıymdardyń qatysýyna barlyq jaǵdaı jasaǵany jıyn kezinde aıqyn kórinip turdy. Qazaqstan bıylǵy jyly óziniń tóraǵalyǵynda josparlaǵan is-sharalardyń barlyǵyn joǵary deńgeıde tabysty júzege asyrdy», - deıdi M.P. de Brıshambo.

***

«Qazaq ádebıeti» aptalyǵyna suhbat bergen belgili zańger QR Parlamenti Májilisiniń depýtaty Ramazan Sarpekov Qazaqstannyń EQYU-ǵa tóraǵalyǵynyń mańyzy, 1-2 jeltoqsanda Astanada ótetin EQYU-nyń 7-sammıti týraly óz oı-pikirlermen bólisken. Basylym tilshisiniń barlyq saýaldaryna tuşymdy jaýap bergen depýtat: «Alqaly jıynda taýly Qarabaq sııaqty uzaqqa sozylǵan janjaldardy toqtatýdyń joly, eki eldi tatýlastyrýdyń tetigi sóz bolmaq. Araaǵaıyndyqqa kelgende EQYU-nyń tóraǵasy retinde Qazaqstannyń da osy daý-damaıdy retteýge qosqan úles bar», - deıdi. Suhbattyń tolyq nusqasyn basylymnyń «Álemge moıyndatatyn kún» degen taqyryppen berilgen maqalasynan oqı alasyzdar.

Astana Sammıti qarsańynda «Qazaq ádeıbeti» aptalyǵynda «Azııa men Eýropa arasyn jalǵaıtyn kópir» degen ortaq taqyryp aıasynda Fılosofııa jáne saıasattaný ınstıtýtynyń dırektory Ábdimálik Nysanbaevtyń, ekonomıka ǵylymdarynyń doktory Óteǵalı Shedenovtiń, saıası ǵylymdardyń kandıtaty Rasýl Jumalynyń jáne Ál-Farabı atyndaǵy QazUÝ-dyń aǵa oqytýshysy Erǵalı Omarǵazynyń oı-pikirler jarııalandy. Máselen, E.Nysanbaev: «Qazaqstan EQYU-nyń synaǵynan súrinbeı ótti. saıası kóshbasy Nursultan Ábishuly Nazarbaev qazaqstandyq dıplomatııanyń qanaty. Qoǵam qaıratkerleri men úkimettik emes sektorlar, bıznes-qoǵam, sarapshylar men qatardaǵy azamattar bir jeńnen qol, bir jaǵadan bas shyǵaryp ózine senip tapsyrylǵan mindetti abyroımen atqaryp shyqty», - deıdi. Al Ó.Shedenovtiń pikirinshe, Qazaqstan álemdegi áleýmettik jáne ekonomıkalyq kóptegen problemalardy reforma júzinde beıbit jolmen sheshe alýda ózindik tájirıbeniń baryn kórsetti. Bul saıası sahnadaǵy «brendimiz». «Árıne, elimizdiń qol jetkize alǵan kez kelgen jetistigi, jemisi - halyqtyń aýyzbirshiligi, Elbasynyń eren eńbegi», - deıdi ol.

***

«EQYU is basyndaǵy tóraǵasy, QR Memlekettik hatshysy - Syrtqy Іster mınıstri Qanat Saýdabaev senbi kúni Armenııa Syrtqy ister mınıstri Edýard Nalbandıanmen telefon arqyly sóılesti», dep jazady «Kazahstanskaıa pravda» gazeti. Basylymnyń atap ótýinshe, áńgimelesýshiler aldaǵy 1-2 jeltoqsandaǵy Astanadaǵy EQYU Sammıtine daıyndyq barysyn jáne onyń mazmundyq toltyrylýyn talqylady. Syrtqy saıasat vedomstvolardyń basshylary osy kezdesýdiń tabysty jáne nátıjeli ótkizilýiniń mańyzyna, onyń barysynda EQYU jaýapkershiligi keńistigindegi yntymaqtastyq pen qaýipsizdikti damytýǵa eleýli úles qosyp otyrǵan Uıymnyń odan ári damýynyń bolashaǵyn aıqyndaıtyn mańyzdy qujattardyń qabyldanýynyń mańyzdylyǵyna toqtaldy.