Astana irgesinde tamaq óńdeıtin 20 zaýyt shoǵyrlanady

ASTANA. KAZINFORM – Astana qalasy ınvestıtsııalar jáne kásipkerlikti damytý basqarmasy basshysynyń orynbasary Nurjan Áshimov 2028 jyly elordada jańa ındýstrııalyq aımaq iske qosylatynyn aıtty.

- №1 ındýstrııalyq parktiń tájirıbesi boıynsha №2 ındýstrııalyq parkti qurý baǵytynda jumys júrgizilip jatyr. Bul jumysty biz memleket-jeke menshik áriptestigi tetigi arqyly uıymdastyramyz. Bıyl konkýrstardy aıaqtap, 2026-28 jyldary parkke ınfraqurylym tartylady. Bul ındýstrııalyq park arqyly 150-den astam jobany tartýǵa, sol arqyly keminde 500 mlrd teńge ınvestıtsııa tartyp, 8 myń jańa jumys ornyn ashýǵa múmkindik týady, - dedi ol.

№2 ındýstrııalyq park negizinen agrarlyq baǵytta damıdy degen jospar bar.

- Indýstrııalyq aımaq iske qosylǵan kezde kem degende 20 tamaq óńdeıtin zaýyt shoǵyrlanady. Sol arqyly taǵy da qala halqynyń suranysyna jaýap beretindeı taýar óndiriledi, - dedi basqarma basshysynyń orynbasary.

Aıta ketý kerek, Astanada №2 ındýstrııalyq parkin ashý bastamasy 2017 jyldan beri aıtylyp keledi.