Astana respýblıkalyq bıýdjettiń negizin quraıtyn tórt donor aımaqtyń qataryna enedi
ASTANA. QazAqparat - Aldaǵy jyldan bastap Astana respýblıkalyq bıýdjettiń negizin quraıtyn tórt donor aımaqtyń qatarynan oryn alady. Bul týraly búgin «Astana Opera» teatrynda Elbasy Nursultan Nazarbaevtyń tóraǵalyǵymen ótip jatqan elordany odan ári damytý jónindegi keńeste qala ákimi Imanǵalı Tasmaǵambetov málim etti.
Ákimniń sózine qaraǵanda, elordanyń ekonomıkalyq áleýetiniń negizin, ıaǵnı shamamen alpys paıyzyn jalpy aımaqtyq ónimmen qamtıtyn shaǵyn jáne orta bıznes alyp otyr. Jalpy qyzmet kórsetý salasynda 316 myń adam jumys isteıdi.
Taratylǵan málimetterge qaraǵanda, osy jyldary Astana ekonomıkasyna 4 trln. 780 mlrd. teńge tikeleı ınvestıtsııa tartyldy. Búginde belsendi shaǵyn jáne orta bıznes sýbektileriniń sany 56 myńnan asyp, byltyrǵa qaraǵanda 17 paıyzǵa artqan. Qazirgi ýaqytta qala qazynasyna quıylǵan salyq túsimderiniń 67 paıyzy shaǵyn jáne orta bıznes ókilderine tıesili. Olar óndirgen ónim kólemi byltyr 1 trln. 200 mlrd. teńgege jetti.
