Astana respýblıkadaǵy eń qaýipsiz joldary bar qalaǵa aınaldy
ASTANA. QazAqparat - «Sergek» beınebaqylaý júıesiniń arqasynda elorda joldary barynsha qaýipsiz bolyp otyr. Bul týraly búgin elorda ákimi Baqyt Sultanov qala aktıvimen ótken jyldy qorytyndylaýǵa arnalǵan jıynda aıtty, dep habarlaıdy QazAqparat tilshisi.
«Memlekettik-jekeshilik áriptestik jobalary aıasynda elimizde eń birinshi bolyp júzege asyrylǵan «Sergek» beınebaqylaý júıesiniń arqasynda Astana joldary respýblıkadaǵy eń qaýipsiz jolǵa aınaldy. Adam ólimi 48 paıyzǵa tómendedi. Jol-kólik oqıǵalarynyń sany 15 paıyzǵa, jol apatynan jaraqat alý deńgeıi 16 paıyzǵa azaıdy», - dedi ol.
Buǵan deıin QR Іshki ister mınıstri Qalmuhanbet Qasymov Qazaqstannyń birqatar oblys ortalyǵyna «Sergek» kameralary ornatylatyndyǵyn aıtqan bolatyn.
«Qazirgi ýaqytta Astanada 400 jol qıylysyn jáne 300 jol ýchaskesin «Sergek» júıesimen jabdyqtaý bastaldy. Jyldyń basynan bastap osy «Sergek» arqyly 260 myń ákimshilik quqyq buzýshylyq anyqtaldy. Bıýdjetke 740 mln teńgeden astam aıyppul óndirildi. Nátıjesinde Astana qalasyndaǵy jol-kólik oqıǵalarynyń sany 20, qaza bolǵandardyń sany 50 jáne jaraqat alǵandardyń sany 23 paıyzǵa azaıdy. Osyndaı jobany Aqtóbe, Atyraý, Pavlodar, Batys Qazaqstan, Shyǵys Qazaqstan oblystarynda júzege asyrý josparlanǵan», - degen edi ol.
