«Astana-REK» AQ elordanyń sol jaǵalaýyndaǵy apat sebebin túsindirdi
«Astana-REK» AQ baspasóz qyzmetiniń habarlaýynsha, 30 qańtar kúni saǵat 20:58-de «Sol jaǵalaý» stansasynyń 407 nómirli 10 kV uıashyǵy apattyq jaǵdaıda óshirilgen. Saldarynan Syǵanaq, Túrkistan jáne Almaty kóshelerindegi 6 turǵyn úıde jaryq óshken. Turǵyn úı keshenderiniń qajettiligin (jylytý, sýmen qamtý, lıft jumysy) óteý úshin jedel brıgada bir saǵatta dızel generatorlaryn ornatty. Esil AEJ jedel-jóndeý brıgadalarynyń, kabeldik jeliler qyzmetiniń, synaq jáne dıagnostıka qyzmetiniń kúshimen (19 adam) elektr berýdiń kabeldik jelisi qalpyna keltirildi.
31 qańtar kúni saǵat 2:17-de atalǵan 6 turǵyn úıdegi elektrmen jabdyqtaý tolyq qalpyna keltirildi.
Apat sebebi: kabel arnasyn ashý kezinde ondaǵy oqshaýlaý qabatynyń tesilgeni anyqtaldy, aqaýly bólik eki mýftany ornatý arqyly aýystyryldy. Jelini tolyq qalpyna keltirgen soń, rezervtik kabeldik jelide jóndeý jumystary júrgiziledi, bul turǵyn úı keshenderiniń ekinshi elektrmen jabdyqtalýyn qamtamasyz etedi.
«Astana-AEK» AQ bas ınjeneri Rýslan Ábjanovtyń aıtýynsha, turǵyn úı keshenderin salýshylar qurylystan keıin jelilerdi jergilikti atqarýshy organdardyń balansyna bermegen, bul jeliler «Astana-AEK» AQ balansyna berý úshin rásimdeý satysynda tur. Sonymen birge, bul kabeldik jelilerdiń oqshaýlaǵyshyna ishinara zaqym kelgen, bul turǵyndardy qalypty elektrmen jabdyqtaýdy qıyndatady. Qazirgi ýaqytta rezervtik jelide de kabeldiń zaqymdanýy tabylyp, jóndelip jatyr.
Eske sala ketsek, 2019 jyly 9 qarashadan 10 qarashaǵa qaraǵan túni saǵat 02.04-te elordadaǵy «Levoberejnaıa» 110/10 kV shaǵyn stansasynyń 10 kV kabel kanalynda órt shyǵyp, kabel jelisi zaqymdanǵan edi. Sonyń saldarynan qalanyń sol jaǵalaýyndaǵy keıbir turǵyn úıler men ákimshilik ǵımarattar jaryqsyz qaldy . Olardyń qatarynda Aqorda, Parlament Senaty, Májilis, Mınıstrlikter Úıi, Úkimet Úıi, Joǵarǵy Sot, «Ýıýt», «Kraýn Plaza», «Tumar» (2 úı), «Art Haýs», «Vıva plaza», «Alataý», «Na vodnom zelenom býlvare», «Báıterek» monýmenti, «Izýmrýdnyı kvartal» bıznes ortalyǵy, «Kerýen», Ulttyq kitaphana men Ulttyq muraǵat ǵımarattary bar.
