Astana Rasýl Ǵamzatovtyń 90 jyldyǵyn atap ótti
ASTANA. 16 sáýir. QazAqparat - Búgin QR Ulttyq akademııalyq kitaphanasynda óz zamananynyń aqıyq aqyny Rasýl Ǵamzatovtyń 90 jyldyǵyna arnalǵan ádebı-mýzykalyq jyr keshi ótti.
Rasýl Ǵamzatov ánge aınalǵan kóptegen tamasha óleńderdiń avtory retinde tanymal. Búgingi keshte de onyń «ıA tebıa nıkogda ı nıgde ne zabýdý», «Jýravlı», «Dololaı» jáne taǵy basqa shyǵarmalary oryndaldy. Sondaı-aq kesh aıasynda «Rasýl Ǵamzatov - meıirim men adamgershiliktiń jyrshysy» atty kitap kórmesi ashyldy. Munda kitaphana qoryndaǵy aqynnyń jyr kitaptary - R.Ǵamzatovtyń bes tomdyǵy, «Dvadtsatyı vek», «Pesn lıýbvı», «Gorıanka», «Skazanııa», «Sýdı menıa po kodeksý lıýbvı», «Knıga ıýmora ı satıry» syndy eńbekter qoıyldy. Onyń ishinde «Tyrnalar» jáne «Meniń Daǵystanym» qazaq tilindegi jınaqtar da bar.
«Rasýl Ǵamzatov qazaqstandyq jazýshylarmen jaqsy qarym-qatynasta boldy. Olar R.Ǵamzatovty qurmettedi. Sol úshin osy jerge, Qazaqstan halqyna sheksiz alǵysymdy bildiremin», - deıdi Daǵystan Respýblıkasynyń Qazaqstandaǵy ókili Charja Gadjımırzaev.
Aıta keteıik, bıyl QR Ulttyq akademııalyq kitaphanasy «Rasýl Ǵamzatov - meıirim men adamgershiliktiń jyrshysy» atty halyqaralyq baıqaýǵa qatysýda. Atalǵan shara Rasýl Ǵamzatov atyndaǵy Hasavıýrt ortalyq qalalyq kitaphanasynyń bastamasymen ótip jatyr. Baıqaýdyń negizgi maqsaty - jas oqyrmandardy poezııaǵa tartyp, sonyń ishinde R.Ǵamzatovtyń shyǵarmashylyǵyn nasıhattaý. Osyǵan oraı, Ulttyq akademııalyq kitaphana «Rasýl Ǵamzatov: qazaqstandyq oqyrmanmen dıalog» taqyrybynda blog ashty (https://nabrk.blogspot.ru). Onda «QR UAK jáne Rasýl Ǵamzatov», «Rasýl Ǵamzatov jáne Qazaqstan», «Biz áli Siz týraly súıispenshilik pen tańdanýǵa toly shyǵarmalar jazamyz...», «My pomnım, my lıýbım, my chıtaem....» atty bólimder bar.
