Astana qalasynyń bas meshiti jáne Fatima qoly kollektsııalyq monetalary aınalymǵa shyǵady
ASTANA. KAZINFORM — Qazaqstan Ulttyq Banki (budan ári – QUB) «Qazaqstannyń meshitteri men shirkeýleri» serııasynan ASTANA QALASYNYŃ BAS MESHITI jáne «Sıqyrly nyshandar» serııasynan FATIMA QOLY kollektsııalyq monetalaryn aınalysqa shyǵarady.
Kollektsııalyq monetalar QUB https://kazcoins.nationalbank.kz/kz ınternet-dúkeni arqyly satylady. ASTANA QALASYNYŃ BAS MESHITI monetasy 2024 jylǵy 25 qarashadan bastap, al FATIMA QOLY 28 qarashada aınalysqa shyǵady.
ASTANA QALASYNYŃ BAS MESHITI kollektsııalyq monetalary týraly
ASTANA QALASYNYŃ BAS MESHITI monetasy «Qazaqstannyń meshitteri men shirkeýleri» serııasyn jalǵastyrady. Moneta 2022 jyly esigin aıqara ashqan Astana qalasynyń ortalyq meshitine arnalǵan. Bul meshit – Qazaqstan men Ortalyq Azııadaǵy eń iri meshit. Monetanyń dızaınynda Astana qalasynyń ortalyq meshitiniń aıshyqtalǵan beınesi jáne musylmansha sálemdesýdi bildiretin arab tilindegi jazý bar.
Monetalar 925 synamdy kúmisten daıyndalǵan. Massasy – 31,1 gramm, dıametri – 38,61 mm, nomınaly – 1000 teńge, taralymy – 1000 (bir myń) dana.
Monetanyń beınesi
FATIMA QOLY kollektsııalyq monetalary týraly
FATIMA QOLY (Fatıma qoly) monetasy – «Sıqyrly nyshandar» serııasynyń altynshy monetasy. Monetanyń dızaınynda ártúrli eldiń mádenıetinde belgili ashyq alaqan túrindegi qorǵanysh tumarynyń órnektelip aıshyqtalǵan beınesi berilgen.
Monetalar emal jaǵý jáne altyn jalatý tehnologııasyn qoldaný arqyly 925 synamdy kúmisten daıyndalǵan. Massasy – 31,1 gramm, dıametri – 38,61 mm, daıyndaý sapasy – antique silver, nomınaly – 1000 teńge, taralymy – 3000 (úsh myń) dana.
Monetanyń beınesi
Kollektsııalyq monetalar Qazaqstan Respýblıkasynyń búkil aýmaǵynda ózderiniń belgilengen qunyna saı tólemderdiń barlyq túri boıynsha qabyldaýǵa, sondaı-aq eldiń barlyq bankinde bank shottaryna esepke alýǵa, aýdarýǵa, usaqtaýǵa jáne aıyrbastaýǵa jatady.
Kollektsııalyq monetalar Qazaqstan teńge saraıynda daıyndaldy.
Eske sala keteıik, buǵan Ulttyq Bank eski úlgidegi 5 000 teńgelik banknotalardyń aınalymda qatar júrý kezeńin uzartqanyn jazǵan bolatynbyz.
