Astana protsesiniń nátıjesinde Sırııa máselesi sheshimin tabady dep úmittenemiz – SІM
ASTANA. KAZINFORM – QR Syrtqy ister mınıstriniń orynbasary Álibek Baqaev Sırııa boıynsha 21-shi halyqaralyq kezdesýdiń qorytyndysy boıynsha málimdemeni oqydy.
Onyń aıtýynsha, múddeli taraptar qaqtyǵystyń saıası sheshimin tabady dep úmitti.
«Taraptar eki kún boıy Sırııadaǵy jaǵdaıdy odan ári turaqtandyrýǵa jáne ondaǵy gýmanıtarlyq jaǵdaıdy jaqsartýǵa baǵyttalǵan asa mańyzdy jáne mazmundy kelissózder júrgizdi. Astana protsesiniń arqasynda Sırııadaǵy jaǵdaı aıtarlyqtaı turaqtanyp, qalpyna keltirý kezeńiniń aldynda tur dep aıtýǵa tolyq negiz bar», - dedi Álibek Baqaev.
Sondaı-aq vıtse-mınıstr Sırııaǵa qatysty sheshilmegen máseleler kepilger elderdiń kúsh – jigeri jáne BUU-nyń turaqty qoldaý arqasynda tıimdi retteletinin aıtty.
«Osyǵan baılanysty múddeli taraptar Astana protsesiniń nátıjesinde qalyptasqan qolaıly jaǵdaıdy barynsha paıdalana otyryp, janjaldyń saıası sheshimin tabady dep úmittenemiz», - dep tolyqtyrdy spıker.
