Astana prokýrorlary jumysshylardyń 46,5 mln. teńge jalaqysyn óteýdi qamtamasyz etti
ASTANA. 10 tamyz. QazAqparat /Qanat Mámetqazyuly/ - Astana qalasy Saryarqa aýdandyq prokýratýrasy «Gorkommýnhoz» AQ 250 jumysshysynyń paıdasyna 46,5 mln. teńge jalaqy boıynsha bereshekti óteýdi qamtamasyz etti.
Bul týraly QR Bas prokýratýrasynyń baspasóz qyzmetinen habarlandy.
Aýdandyq prokýratýra 2011 jyldan bastap «Gorkommýnhoz» AQ atyna kásiporyn jumysshylarynyń jalaqysyn tóleý týraly 6 uıǵarym engizgen edi. Uıǵarymdar májbúrlep oryndaý úshin Astana qalasy Sot aktilerin oryndaý jónindegi departamentke joldanǵan bolatyn. «Osyǵan oraı, sot oryndaýshylary qabyldaǵan sharalardyń nátıjesinde Astana qalasy Sot aktilerin oryndaý jónindegi departamentiniń baqylaý shotyna 46,5 mln. teńge tústi. Qazirgi tańda, kelip túsken aqsha qarajattaryn óndirip alýshylardyń shottaryna aýdarý boıynsha sharalar qabyldanyp jatyr», - delingen baspasóz habarlamasynda.
