Astana prokýratýrasy jemqorlyq qylmystaryna jıi baratyn memlekettik organdardy atady
ASTANA. 10 qarasha. QazAqparat /Jasulan Amanbaıuly/ - Sońǵy on aıda Astanada 102 jemqorlyq qylmysy anyqtaldy.
Onyń ishinde memlekettik qyzmet fýnktsııalaryn atqarýǵa ýákiletti tulǵalarǵa jáne olarǵa teńestirilgen tulǵalarǵa qatysty 83 qylmystyq is qozǵaldy, 62-sine qatysty tártiptik jaza qoldanyldy.
Bul týraly búgin elordada «Nur Otan» HDP qalalyq fılıalynyń jemqorlyqqa qarsy forýmynda Astana qalasy prokýrorynyń orynbasary Almat Baısholaqov málim etti.
Onyń atap ótkenindeı, qylmystardyń ishinde qyzmet babyn asyra paıdalaný, para alý, alaıaqtyq, bıýdjettik qarajatty urlaý eń kóp taralǵan jemqorlyq faktileri bolyp tabylady.
Forým barysynda Astana prokýrorynyń orynbasary jemqorlyq qylmystaryna jıi baratyn memlekettik organdardy atap shyqty.
Statıstıka boıynsha, eń kóp jemqorlyq faktileri ishki ister organdarynda anyqtalǵan. Olardyń tarapynan 18 qylmys tirkelgen.
«Jergilikti ózin ózi basqarý bólimshelerinde - 10 qylmys, salyq organdary men Aýyl sharýashylyǵy mınıstrliginiń bólimshelerinde - 4 qylmystan anyqtaldy», - deıdi ol.
