Astana prokýratýrasy zańsyz jumysqa alynǵan Túrkııa azamattaryn elderine qaıtardy
ASTANA. 3 maýsym. QazAqparat - Astana qalalyq prokýratýrasy 2013 jyldyń ótken toqsanynda «Astana qalasynyń Jumyspen qamtý jáne áleýmettik baǵdarlamalar basqarmasy» memlekettik mekemesiniń qyzmetinde «TROY Tech» jaýapkershiligi shekteýli seriktestigine sheteldik jumys kúshin tartýǵa ruqsat berý zańdylyǵyna tekserý júrgizdi.
Tekserý barysynda Túrkııa Respýblıkasynyń azamattaryn jumysqa tartý maqsatynda ýákiletti organǵa tapsyrylǵan qujattar jalǵan bolǵany anyqtaldy. Bul týraly qalalyq prokýratýranyń baspasóz qyzmetinen habarlandy.
«Sheteldik qyzmetkerge jumysqa ornalasýǵa jáne jumys berýshilerge sheteldik jumys kúshin tartýǵa ruqsat berýdiń qaǵıdalary men sharttaryna sáıkes, ruqsat berý tártibi men sharttary naqty aıqyndalǵan. Sheteldik jumys kúshin tartýǵa ruqsat berýdiń negizgi sharttarynyń birine shetel azamatynyń bilimi jáne medıtsınalyq anyqtamasynyń bolýy mindetti. Degenmen, júrgizilgen tekserý nátıjesinde, atalǵan kásipkerlik sýbektisinde jumys istegen shetel azamattary usynǵan 10 medıtsınalyq anyqtamanyń barlyǵy jalǵan ekendigi anyqtaldy»,- delingen baspasóz baıanynda.
Sonymen qatar, Túrkııa azamaty Dogrý Shabannyń tarapynan joǵarǵy oqý ornyn bitirgeni jóninde jalǵan dıplom usynylǵany anyqtaldy. Bul zańsyzdyqtarǵa qaramastan ýákiletti organ atalǵan mekemege 10 shetel azamatyn jumysqa tartýǵa ruqsat bergen. Osyǵan baılanysty qalalyq prokýratýra atalǵan derekter boıynsha qylmystyq is qozǵap, tergeý amaldaryn júrgizý úshin ony ishki ister organyna joldady.
Buǵan qosa, usynylǵan jalǵan medıtsınalyq anyqtamalar boıynsha protsessýaldyq sheshim qabyldaý úshin jınaqtalǵan qujattar ishki ister organyna joldanyp, ol boıynsha da qylmystyq is qozǵaldy.
Sondaı-aq, Astana qalasynyń prokýratýrasy ýákiletti organǵa engizilgen prokýrorlyq yqpal etý aktisiniń negizinde, Túrkııa azamattaryn jumysqa tartý úshin berilgen ruqsattyń kúshi joıylyp, shetel azamattary óz elderine qaıtaryldy.
