Astana prokýratýrasy dárigerlermen men polıtseılerdiń esirtki bıznesimen kúrestegi olqylyqtaryn jaıyp saldy
Prokýratýra ókiliniń aıtýynsha, jyl saıyn qalalyq medıtsınalyq mekemelerge esirtkini shamadan tys paıdalaný belgilerimen 300-ge tarta adam túsedi eken.
«Sonyń ishinde olardyń tórtten biri júıeli túrde osy jaǵdaıdy qaıtalaıdy. Ókinishke qaraı, adamdardyń osy sanaty quqyq qorǵaý organdary qyzmetkerleriniń baqylaýynan tys qalyp jatyr. Medıtsınalyq mekemeler bundaı oqıǵalar týraly quqyq qorǵaý organdaryna habarlama jasamaıdy, bul úshin zańnamalyq talaptar joqtyǵyn da alǵa tartady», - deıdi R. Áıtimov.
Osyǵan oraı, quqyqtyq olqylyqtyń ornyn toltyrý maqsatynda esirtki qylmysymen kúrestegi yntymaqtastyq týraly buıryq ázirlengen. Ol boıynsha medıtsına qyzmetkerleri esirtkini paıdalaný belgileri boıynsha kómekke júgingen azamattar týraly barlyq oqıǵalardy habarlap turýǵa mindetteledi.
«Ókinishke qaraı, bundaı buıryqtyń bar ekenin tergeýshiler bilmeıdi, sosyn máselege mán berilmeı keledi», - dedi prokýror kómekshisi. Onyń málimetterine qaraǵanda, atalǵan buıryq shyqqannan keıin de medıtsına qyzmetkerleri esirtkini paıdalaný belgilerimen túsken azamattarǵa qatysty 30 oqıǵa týraly eshqaıda habarlama joldamaǵan. Al esirtkini kóp mólsherde paıdalaný saldarynan júıeli túrde mekemege túsetinderdi anyqtaý maqsatyndaǵy jýrnalǵa sáıkes, 59 nashaqordyń aı saıyn 2-3 márte ártúrli mekemelerge túsetini anyqtalǵan. Osy fakti boıynsha qalalyq prokýratýra tamyz aıynda 4 jedel aldyn alý sharalaryna bastamashylyq jasady.
«Prokýratýra tarapynan naqty málimetter kórsetilip, tıisti meken jaılary usynylǵanymen, Esirtki bıznesine qarsy kúres basqarmasy ondaı faktilerden esh nátıje shyǵarmady», - dedi R. Áıtimov.