Astana prokýratýrasy Bıshimbaevtyń isin sotqa joldady
ASTANA. QazAqparat - 14 qazan kúni Astana qalasynyń prokýratýrasy burynǵy Ulttyq ekonomıka mınıstri Qýandyq Bıshimbaevtyń isin sotqa joldady, dep habarlaıdy «QazAqparat» HAA tilshisi.
Bul týraly prokýratýranyń baspasóz qyzmeti habarlady. Buǵan deıin eks-mınıstrdi tutqynda ustaý merzimi eki ret uzartylǵan edi.
Eske sala ketsek, 2017 jyldyń 10 qańtarynda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn málimdegen bolatyn. Ulttyq bıýrodan habarlaǵandaı, ol bir top adammen aldyn ala kelisip, iri kólemde birneshe márte para aldy dep aıyptalýda. Bıshimbaev Qyzylorda qalasynda shyny tabaq shyǵaratyn jáne óńdeıtin zaýyt salý kezinde «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy degen kúdikke ilindi. 12 qańtar kúni Astana qalasy Almaty aýdandyq №2 soty Qýandyq Bıshimbaevqa qatysty ony «qamaýǵa alý» týraly sanktsııa berdi. Tergeý nusqasy boıynsha, Bıshimbaev zańsyz jolmen alǵan aqshalaı qarajatty jeke qajettilikterine jumsaǵan.
Bıshimbaev Prezıdenttiń jarlyǵymen 2016 jyldyń 28 jeltoqsanynda mınıstr qyzmetinen bosatyldy. Ol bul laýazymda 8 aı jumys istedi. 2013 jyldyń 30 mamyrynan 2016 jyldyń 5 mamyryna deıin « «Báıterek» Ulttyq basqarý holdıngi» AQ-nyń basqarma Tóraǵasy boldy.
