Astana prokýratýrasy ákimdik qyzmetkerlerin tekserý úshin Antıkorǵa materıaldar joldady

ASTANA. QazAqparat – Astana qalalyq prokýratýrasy elorda ákimdigindegi jer, sáýlet jáne qala qurylysy zańnamasy salasyndaǵy kóptegen olqylyqtardy anyqtady. Laýazymdy tulǵalardyń is-áreketin baǵalaý úshin jınalǵan materıaldar elordalyq Sybaılas jemqorlyqqa qarsy qyzmetke joldanǵan, dep habarlaıdy QazAqparat tilshisi.

«Prokýratýra júrgizgen tekseris nátıjesinde kóptegen buzýshylyqtar anyqtaldy. Onyń ishinde naqty jospar jobasyna ózgeris engizý, memlekettik jerlerdi berý, jobalaý jumystaryna ruqsat etý, sondaı-aq eskızdik jobalardy kelisý týraly sheshimder qabyldaý áreketteri bar», - delingen elordalyq prokýratýranyń QazAqparat tilshisiniń saýalyna joldaǵan jaýabynda.

Vedomstvodan atap ótkendeı, anyqtalǵan faktiler boıynsha qadaǵalaý aktisi shyǵarylǵan. Búgingde ákimdik anyqtalǵan olqylyqtardy joıý úshin jumystar júrgizýde.

«Sonymen qatar, laýazymdy tulǵalardyń is-áreketterine baǵa berý úshin aqparattar elordalyq Sybaılas jemqorlyqqa qarsy qyzmetke jiberildi», - dep málim etti prokýratýradan.

Quzyrly organ tekserý nátıjelerin egjeı-tegjeı baıandaǵan joq.

Eske salaıyq, taıaýda BAQ betterinde 2019-2022 jyldar aralyǵynda jer ýchaskelerin berýge jáne qalada qurylys salýǵa jaýapty Astana ákimdiginiń bólimshelerin tekserý júrip jatqany týraly aqparat tarady. Bul aralyqta elorda ákimi laýazymynda Altaı Kólginov qyzmet etti. Prokýratýra mamandary bastapqyda ondaǵan mektep, aýrýhana men balabaqsha salý josparlanǵan ýchaskelerdiń naqty jobasyna túzetý engizýdiń 61 faktisin anyqtaǵan. Tıisinshe, bilim ordalary men medıtsınalyq uıymdar boıy kóterýi tıis jerlerge turǵyn úıler salynǵan.