Astana prokýratýrasy memleketke 9,8 mlrd teńge óndirý týraly 11 talap qoıdy
ASTANA. KAZINFORM - Astana qalasynyń prokýratýrasy 2026 jyldyń basynan beri memleketke keltirilgen zalaldy óteý boıynsha jalpy somasy 9,8 mlrd teńgege 11 talap qoıý engizdi, dep habarlaıdy prokýratýranyń baspasóz qyzmeti.
Sotta qaralǵan isterdiń birinde Astana turǵyny jalǵan shot-faktýralar jazyp bergeni úshin qylmystyq jaýapkershilikke tartyldy.
Tergeý barysynda 2021-2022 jyldary sottalǵan azamattyń ózi basqarǵan JShS atynan naqty jumys atqarmaı jáne qyzmet kórsetpeı, jalǵan elektrondyq shot-faktýralar jazýdy uıymdastyrǵany anyqtaldy.
Sonyń saldarynan bıýdjetke tıisti salyqtar tólenbegen.
Qala prokýratýrasy memleketke keltirilgen zalaldy óteý týraly talap qoıdy. Sot prokýrordyń talabyn qanaǵattandyryp, sottalǵan azamattan memleket kirisine 304 mln teńgeden astam qarajat óndirdi.
Prokýratýra málimetinshe, memleketke keltirilgen zalaldy óteý prokýratýra organdary qyzmetiniń basym baǵyttarynyń biri sanalady. Bul baǵyttaǵy jumys turaqty baqylaýda.
Osyǵan deıin prokýratýranyń 21 myńnan astam sportshynyń quqyǵyn qorǵaǵany týraly jazdyq.
