Astana prokýratýrasy ınvestorlarǵa qatysty 30-dan astam zańsyz sheshimdi toqtatty
ASTANA. KAZINFORM – Astana qalasynyń prokýratýrasy ınvestorlardyń quqyqtaryn qorǵaý baǵytyndaǵy jumysty jalǵastyryp, 30-dan astam zańsyz sheshimniń jolyn kesti.
Vedomstvo málimetinshe, bul baǵyttaǵy negizgi tetik – «prokýrorlyq súzgi». Atalǵan mehanızmge sáıkes ınvestorlarǵa qatysty kez kelgen shekteý sharalary mindetti túrde prokýrormen kelisiletin bolady.
– Investorlarǵa qatysty tekserýler taǵaıyndaý, tyıymdar engizý, ákimshilik is júrgizýdi qozǵaý nemese talap-aryzdardy bastamalaý sekildi barlyq shekteý sharalary «prokýrorlyq súzgi» arqyly ótedi. Búgingi tańda memlekettik organdar qabyldaǵan 20-dan astam zańsyz sheshimdi kelisýden bas tarttyq, – dedi qala prokýrory Ǵabıt Muqanov.
Sonymen qatar prokýratýra bul talapty aınalyp ótip qabyldanǵan sheshimderdi de anyqtaǵan.
– «Prokýrorlyq súzgini» aınalyp ótip qabyldanǵan 18 sheshim anyqtalyp, olardyń kúshi joıyldy. Bul ınvestorlardyń zańdy quqyqtaryn qorǵaýǵa múmkindik berdi, – dep atap ótti ol.
Máselen, aqpan aıynda azamattyq qorǵaý organy prokýratýramen kelisýsiz modemder men kommýtatorlar óndiretin kásiporynnyń qyzmetin eki aıǵa negizsiz toqtatqan.
– Prokýratýranyń narazylyǵy nátıjesinde bul sheshimniń kúshi joıylyp, ınvestıtsııalyq joba qaıta iske qosyldy, – delingen málimette.
Qala prokýratýrasy ákimshilik kedergilerge tap bolǵan ınvestorlardy arnaıy baılanys arnalary arqyly habarlasýǵa shaqyrdy.
Aıta keteıik, Qazaqstanda ınvestorlar men bıznes ókilderi úshin vıza rásimdeý jumystary jeńildedi.
