Astana prokýratýrasy ınvestordyń quqyǵyn qorǵap, 20 mln dollarlyq jobany iske qosty
ASTANA. KAZINFORM — Astana qalasynyń prokýratýrasy Investorlardyń quqyqtaryn qorǵaý komıtetiniń úılestirýmen jańa tseh salyp jatqan «Kómek Mashınerı Qazaqstan» JShS-niń quqyǵyn qorǵady. Bul týraly qalalyq prokýratýra málim etti.
Kompanııa naryqta 2008 jyldan beri jumys isteıdi, júk tehnıkasyna qyzmet kórsetýge jáne jóndeýge mamandanǵan.
— Sheteldik ınvestıtsııalar esebinen iske asyrylatyn jobanyń jalpy quny 20 mln AQSh dollaryn quraıdy. Nysandy iske qosý 50 jańa jumys ornyn qurýǵa múmkindik beredi, — delingen habarlamada.
Prokýratýranyń málimetinshe, ınvestor memlekettik saraptamadan ótý kezinde kedergilerge tap bolǵan. Sý qorǵaý beldeýiniń shekaralaryn aýystyrý qajettiligi týyndaǵan. Sonymen qatar, kompanııaǵa qurylys-montajdaý jumystaryna (QMJ) ruqsat bermeı qoıǵan.
Osy máselege qatysty qala prokýratýrasy ýákiletti organdarmen keńes ótkizgen. Qabyldanǵan sharalardyń nátıjesinde ákimdik sý qorǵaý beldeýiniń shekarasyn aýystyrý týraly qaýly shyǵaryp, al ınvestorǵa QMJ júrgizýge talon berilgen.
Búgingi tańda ınvestordyń quqyqtary qorǵalǵan, tseh qurylysy bastaldy.
Buǵan deıin prokýratýra zańsyz memlekettik satyp alýdyń jolyn toqtatty.
