Astana protsesiniń kepilger elderi birlesken málimdeme qabyldady

NUR-SULTAN. QazAqparat - Astana protsesiniń kepilger elderi Iran, Reseı jáne Túrkııa 14-raýnd qorytyndysynda birlesken málimdeme qabyldady. Málimdemeni QR Syrtqy ister mınıstriniń birinshi orynbasary Shahrat Nuryshev jarııa etti, dep habarlaıdy QazAqparat tilshisi.

«Iran, Reseı jáne Túrkııa Astana protsesiniń kepilgeri retinde Sırııa Arab Respýblıkasynyń egemendigin, táýelsizdigin jáne aýmaqtyq tutastyǵyn, sonymen qatar BUU maqsattary men ustanymdaryn buljymastan moıyndaıtyndyǵyn qýattady. Bul ustanymdar jalpy ortaq saqtalýy jáne qurmetteýli tıistigin atap ótti. Osyǵan oraı olar terrorızmmen kúresti jeleý etip, zańsyz derbes basqarý bastamasyn qosa alǵanda Sırııa jerinde jańa realııa qurýǵa barlyq umtylystardy joqqa shyǵardy jáne Sırııanyń egemendigi men aýmaqtyq tutastyǵyn buzýǵa baǵyttalǵan, kórshi elderdiń qaýipsizdigine qater tóndiretin separatıstik josparlarǵa qarsy turýda tabandylyq tanytatyndyqtaryn bildirdi», - delingen málimdemede.

Sonymen qatar kepilger elder munaıdyń jáne ony satýdan túsken kiristiń Sırııa Úkimetine tıesili bolýy qajettigine basa nazar aýdarǵan. Izraıl tarapynan qarýly shabýyldyń jalǵasyp otyrǵandyǵyn aıyptaıdy. Bul halyqaralyq quqyq pen halyqaralyq gýmanıtarlyq quqyqqa qaıshy keledi jáne Sırııa men kórshiles elderdiń egemendigine nuqsan keltirip, óńirdegi turaqtylyq pen qaýipsizdikke qater tóndiretindigin atap ótedi.

«Sırııanyń soltústik-shyǵysyndaǵy ahýaldy talqylap, bul aýdanda uzaqmerzimdi turaqtylyq pen qaýipsizdikke qol jetkizý eldiń egemendigi men aýmaqtyq tutastyǵyn saqtaý negizinde ǵana múmkin ekendigine kelisti. Osyǵan oraı 2019 jyldyń 22 qańtarynda SAR-dyń soltústik-shyǵysyn turaqtandyrý boıynsha memorandýmǵa qol qoıylýyna qoldaý bildirip, 1998 jylǵy Adan kelisiminiń mańyzdylyǵyn rastady», - dep atap ótedi kepilger elder.