Astana protsesiniń besinshi kezeńine barlyq kepil memleketter qatysady - QR SІM

ASTANA. QazAqparat  - QR Syrtqy ister mınıstri Qaırat Ábdirahmanov Sırııadaǵy  jaǵdaıdy retteý boıynsha 4-5 shilde kúnderi elordada ótetin Astana protsesiniń 5 kezeńine daıyndyq barysy týraly áńgimeledi, dep habarlaıdy QazAqparat HAA tilshisi.

Onyń aıtýynsha, besinshi jıynǵa barlyq kepil memleketter qatysatyndaryn rastaǵan.

«Barlyq kepil memleketter Sırııadaǵy jaǵdaıdy retteý boıynsha kelissózderdiń V kezeńine qatysatyndaryn rastady. Oǵan RF Prezıdentiniń arnaıy ókili, RF Syrtqy ister mınıstriniń arnaıy ókili, Túrkııa men Iran syrtqy ister mınıstrleriniń orynbasarlary keledi», - dedi Ábdirahmanov.

Kelissózderdiń ózge de qatysýshylary arasynan ázirge Sırııa úkimeti men Sırııa qarýly oppozıtsııasynyń ǵana kelý-kelmeýi belgisiz.

 «BUU arnaıy ókili Staffende Mıstýra men Iordanııa delegatsııasy da kelissózderge qatysatyndaryn rastady. AQSh  ta baqylaýshy retinde óziniń joǵary laýazymdy ókilin jiberedi dep kútilýde.  Sırııa arab respýblıkasy men Sırııa qarýly oppozıtsııasynyń qatysýy týraly naqty sheshimdi kútip otyrmyz», - dedi mınıstr. 

Eske sala ketsek, Sırııadaǵy jaǵdaıdy retteý boıynsha Astana protsesiniń V raýndy 4-5 shilde kúnderi Qazaqstan astanasynda ótedi. Buǵan deıin sırııaaralyq kelissózder máseleleri boıynsha 23-25 qańtar, 15-16 aqpan, 14-15 naýryz jáne 2-3 mamyr kúnderi tórt kezdesý ótken edi.