Astana protsesine qatysýshylardyń Sırııadaǵy lańkestermen kúreske kóńilderi toldy

ASTANA. QazAqparat - QR Syrtqy ister mınıstri Qaırat Ábdirahmanov Sırııadaǵy qaqtyǵysty retteý jónindegi Astana protsesi aıasyndaǵy jetinshi halyqaralyq kezdesýdiń qorytyndysyna oraı kepilger elder Reseı, Iran jáne Túrkııanyń birlesken málimdemesin jarııa etti, dep habarlaıdy QazAqparat.

Qujatta taraptardyń 2017 jyldyń 4 mamyrynda qabyldanǵan Sırııada deeskalatsııa aýmaǵyn qurý týraly memorandýmnyń qabyldanǵanyna 6 aı ýaqyt ótkennen keıingi jaǵdaıǵa qanatattanatyndyǵy aıtylǵan. Olar deeskalatsııa aýmaǵy qurylǵan sátten bastap terrorızmmen kúreste jáne DAISh, Djabat an-Nýsrany, sonymen qatar Ál-Kaıdamen nemese DAISh-pen baılanysy bar ózge de toptardy joıýda ilgerilýshilik bar ekendigin atap ótti. Buǵan qosa, kepilger elder olarmen deeskalatsııa aýmaǵynda jáne odan tysqary jerlerde kúresti jalǵastyrý úshin qajetti barlyq sharalardy qabyldaýǵa daıyn ekendikterin qýattady.

Sonymen qatar Reseı, Iran jáne Túrkııa kezekti márte sırııalyq qaqtyǵystyń áskerı sheshimi joq ekendigin jáne BUU Qaýipsizdik keńesiniń qararyn oryndaý negizindegi saıası protsess barysynda ǵana rettelýi tıistigin kezekti márte eske saldy.

«Úshinshiden, kepilger elder BUU qamqorlyǵymen Jeneva protsesi aıasynda Reseıdiń Ulttyq dıalog kongresin shaqyrý týraly usynysyna kelisedi. Reseılik tarap bul jaıynda kepilger elderge aqparat berdi», - dedi birlesken málimdemeni jarııa etken Qazaqstan Syrtqy ister mınıstri.

Atalǵan qujatta kepilger elder Sırııa qaqtyǵysyn retteý jónindegi 7-shi halyqaralyq kezdesýdi joǵary deńgeıde uıymdastyrǵany úshin QR Prezıdenti Nursultan Nazarbaevqa jáne qazaqstandyq bılikke rızashylyǵyn bildirgen.

Kezdesý qorytyndysynda taraptar Sırııa qaqtyǵysyn retteý jónindegi joǵary deńgeıdegi kelesi kezdesýdi 2017 jyldyń jeltoqsan aıynyń ortasynda Astanada ótkizý týraly sheshim qabyldady.