Astana protsesine qatysýshylar Sochıde sırııaaralyq kongress ótkizýge ýaǵdalasty

ASTANA. QazAqparat - Sochıde Ulttyq dıalogtyń sırııaaralyq kongresi ótedi. Bul jaıynda búgin sırııalyq qaqtyǵysty retteý jónindegi Astana protsesiniń 7-shi halyqaralyq kezdesýine qatysýshylar ýaǵdalasty, dep habarlaıdy QazAqparat.

Kezdesýdiń qorytyndysyna arnalǵan baspasóz máslıhaty barysynda Sırııa Arab Respýblıkasynyń BUU janyndaǵy turaqty ókili Bashar al-Djafarı ulttyq dıalog kongresiniń Sırııa men Reseı arasyndaǵy uzaq ýaqytqa sozylǵan dıalog pen úılestirý is-qımyldarynyń  nátıjesi ekendigin atap ótti.

«Maıdandaǵy jaǵdaıdy, sonymen qatar Sırııadaǵy lańkestik áreketterdiń azaıýyn eskere otyryp, biz mundaı konferentsııany ótkizetin qolaıly sát týyndady dep sheshtik. Árıne, biz oǵan qatysýǵa daıynbyz. Bastapqyda konferentsııany Sırııada  ótkizý usynylǵan edi. Keıinnen ótkizý orny retinde Reseı tańdaldy», - dedi ol.

Al RF Prezıdentiniń Sırııa jónindegi arnaýly elshisi Aleksandr Lavrentev atalǵan sırııaaralyq mańyzdy kezdesýdi bastapqy kezde Sırııanyń ózinde ótkizý nusqasy qaralǵandyǵyn rastady.

«Biraq qaýipsizdikti qajetti deńgeıde qamtamasyz etýge múmkindik bermeıtin oryn alǵan jaıttardy eskere kele, bul sharany Reseı aýmaǵynda ótkizý týraly sheshim qabyldandy. Atalǵan forýmdy ótkizýge eń qolaıly nusqa Sochı qalasy  bolmaq degendi men taıaýda ǵana estip bildim. Ózderińizde bilesizder, atalǵan kongrestiń barlyq qatysýshylarynyń qaýipsizdik máselesin aıtpaǵannyń ózinde ol jerde sáıkesinshe ınfraqurylym men múmkinshilik bar», - dedi Lavrentev.