Astana protsesine qatysýshylar Sırııadaǵy soǵysty toqtatý rejimin monıtorıngileýge ýaǵdalasýy qajet - Kóshkinbaev

ASTANA. QazAqparat - Astana protsesine qatysýshylar Sırııadaǵy soǵysty toqtatý rejimin monıtorıngileý týraly ýaǵdalasýy qajet. Mundaı pikirdi QR Prezıdenti janyndaǵy Qazaqstannyń strategııalyq zertteýler ınstıtýty dırektorynyń orynbasary Sanat Kóshkinbaev bildirdi, dep habarlaıdy QazAqparat.

«Astanadaǵy kelissózderdegi eń basty másele  Sırııadaǵy soǵysty toqtatý rejimin nyǵaıtý. Bul negizgi másele ári ol Astanada qańtar, aqpan jáne naýryz aılarynda ótken barlyq kelissózderde talqylanǵan bolatyn. Buǵan deıingi úsh kezeń de dál osy taqyrypqa arnaldy. Birden atap óterligi, astana alańyndaǵy kelissózder keńeıtilgen quramda ótetin Jeneva kelissózderin tolyqtyra túsedi. Astana kelissózderinde nazar naqty máselelerge aýdarylǵan. 2016 jyldyń jeltoqsanynda soǵysty toqtatý týraly ýaǵdalastyqqa qol jetkizildi. Alaıda, bul ýaǵdalastyq únemi buzylyp, hımııalyq shabýyl jasaldy, AQSh úkimettik avıabazaǵa zymyranmen soqqy jasady», - dedi Kóshkinbaev.

Saıasattanýshynyń atap ótýinshe, Sırııada azamattyq qaqtyǵys oryn alýda. Bul elde soǵys zardabyn tartpaǵan birde-bir turǵyn joq.

Osy rette Kóshkinbaev Astana kelissózderine qatysýshylar úshin eń mańyzdy mindet soǵysty toqtatý jáne soǵysty toqtatý rejimin buzý monıtorıngi tetikterin ázirleý bolatyndyǵyn basa aıtty.

«Sırııa aýmaǵy bólshektengen. Ony túrli qarýly toptar baqylaýda ustap otyr. Buǵan qosa el aýmaǵynyń biraz bóligin DAISh baqylaýyna alǵan. Jaǵdaı óte aýyr ári soǵysty toqtatý rejiminiń buzylǵanyna kim jaýapty ekendigin anyqtaý qıyn. Janjaldasýshy taraptar jaýapkershilikti bir-birine siltep otyrady. Sondyqtan barlyq taraptardyń seniminen shyǵatyn monıtorıngileý tetigi qajet. Máselen, bul tetik BUU qamqorlyǵymen nemese sáıkesinshe mandaty bar beıtarap baqylaýshy tarabynan júzege asyrylýy múmkin», - dedi saıasattanýshy.