Astana protsesine qatysýshylar qandaı ýaǵdalastyqqa qol jetkizedi

ASTANA. QazAqparat - Búgin jáne erteń elordada Sırııa daǵdarysy boıynsha kelissózderdiń kezekti besinshi kezeńi ótedi. Osyǵan oraı búgin Úkimet otyrysynan keıin BAQ ókilderiniń saýaldaryna jaýap bergen elimizdiń Syrtqy ister mınıstri Qaırat Ábdirahmanov Astana protsesiniń kún tártibi jaıyndaǵy derektermen bólisti, dep habarlaıdy QazAqparat. 

«Eń aldymen mamyrdaǵy kezdesý barysynda kepilger elder (Reseı, Túrkııa jáne Iran) qol qoıǵan 4 deeskalatsııa aýmaǵyn qurý týraly memorandýmdy qalaı júzege asyrý jaıy sóz bollady. Bul memorandýmdy júzege asyrý josparynda atalǵan aýmaqtardyń shekaralaryn qalaı anyqtaý, sonymen qatar deeskalatsııa aýmaqtaryna baqylaýdy anyqtaý jáne ony jasaý syndy máseleler mańyzdy mánge ıe ekendigi sózsiz. Esterińizde bolsa, atalǵan memorandýmda deeskalatsııa aýmaǵynyń shekara boıynsha baqylaý-ótkizý pýnktterin jáne baıqaý pýnktterin ornatý tıistigi aıtylǵan edi», - dedi mınıstr.

Sonymen qatar onyń sózine qaraǵanda, ıÝNESKO-nyń kepiline alynǵan jáne atalǵan halyqaralyq uıymnyń dúnıejúzilik mádenı mura tizimine engen Sırııadaǵy mádenı nysandardy mınadan tazartý máselesin de egjeı-tegjeıli talqylaý josparlanyp otyr.

Ábdirahmanov Sırııa aýmaǵynda taraptardyń soǵys is-qımyldaryn toqtatý jáne tatýlasý rejimine baqylaý jasaý jónindegi reseılik ortalyq málimetterine súıene otyryp, tatýlasý rejimine shamamen 65 qarýly oppozıtsııalyq toptyń qosylǵanyn aıtty.

«Kelissózderdiń osynaý mańyzdy kezdesýine qatysýy josparlanǵan barlyq delegatsııa keldi. Bul joly maǵan baıan etilgendeı elordamyzǵa qazirgi ýaqytta sırııalyq qarýly oppozıtsııanyń 9 ókili keldi», - dedi Ábdirahmanov.