Astana protsesine Irak pen Lıvan baıqaýshy retinde qatysady
NUR-SULTAN. QazAqparat - Qazirgi ýaqytta Qazaqstan Respýblıkasy Syrtqy ister mınıstrliginiń úılestirýimen bıylǵy jyldyń 1-2 tamyzynda Nur-Sultan qalasynda ótkizilýi josparlanǵan Sırııa boıynsha joǵary deńgeıdegi halyqaralyq kezdesýdiń kezekti 13-shi raýndyna daıyndyq jumystary tolyq qarqynmen júrgizilýde. Bul týraly QR syrtqy ister mınıstrliginiń resmı saıtynda habarlandy.
«Búgingi kúnge deıin barlyq shaqyrylǵan taraptar ózderiniń qatysatyndyǵyn rastady. Atap aıtqanda, Reseı delegatsııasyn RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegatsııasyn TR syrtqy saıası vedomstvo basshysynyń orynbasary Sedat Onal basqarady. Iran delegatsııasyna Syrtqy ister mınıstriniń saıası ister jónindegi joǵary kómekshisi Alı Asgar Hadjı basshylyq etedi»,-delingen habarlamada.
Sonymen birge, atalǵan kezdesýge Sırııadaǵy eki qaqtyǵysýshy tarap – Sırııanyń BUU-daǵy Turaqty ókili Bashar ál-Djaafarı bastaǵan SAR úkimettik delegatsııasy jáne Ahmad al-Toýma bastaǵan qarýly oppozıtsııa qatysady. Kezdesýdiń jańalyǵy - Astana formatyndaǵy buǵan deıingi kelissózder negizinde qabyldanǵan sheshimge sáıkes, Irak pen Lıvan delegatsııalary atalǵan protseske baıqaýshylar retinde qatysady.
Ókinishke oraı, BUU Bas hatshysynyń Sırııa jónindegi arnaıy ókili Geır Pedersen densaýlyǵyna baılanysty aldaǵy kelissózderge qatysa almaıtyn boldy. BUU delegatsııasyn onyń orynbasary basqarady.
Buǵan qosa, osy kúnderi sırııaaralyq kelissózder sheńberinde ótetin Tutqyndardy bosatý, qaza tapqandardyń denelerin tabystaý jáne iz-túzsiz joǵalǵandardy izdestirý boıynsha jumys tobynyń kezekti kezdesýine qatysý úshin BUU Bosqyndar isi jónindegi joǵarǵy komıssary basqarmasy jáne Halyqaralyq Qyzyl Krest Komıtetiniń ókilderi Nur-Sultanǵa keledi.
Buryn ótken sırııaaralyq kelissózderge uqsas, birinshi kúni «jabyq esik» jaǵdaıynda ekijaqty jáne kópjaqty tehnıkalyq konsýltatsııalar, al kelesi kúni jalpy otyrys ótedi. Eki kúndik kelissózderdiń negizgi nátıjeleri Astana protsesiniń kepilger memleketterimen qabyldanatyn Birlesken málimdemesinde baıandalady.
