Astana protsesinde soǵysty toqtatý rejimine sırııalyq eldi mekenderdi kóptep qosý máselesi talqylanady
Onyń aıtýynsha, sırııalyq kezdesýdiń jalpy otyrysy barysynda belgili bir eldi mekenderdiń soǵysty toqtatý rejimine qosylýy máselesi qaralatyn bolady.
«Bul óte mańyzdy másele. Óıtkeni, Astana protsesiniń praktıkalyq bóliginiń máni de osynda. Soǵysty toqtatý rejimine eldi mekender kóptep qosylatyn bolsa, onda bul sırııalyq retteýde oń nátıjeler beredi», - dedi departament dırektory.
Sonymen qatar ol qazirgi ýaqytta taraptardyń kelissózderi bastalǵanyn, oǵan Iordanııa tarabynan joǵary deńgeıdegi sarapshylardyń qatysyp jatqandyǵyn aıtty.
«Oppozıtsııa ókilderi kelissózderdiń birinshi raýndyna qatysqan toptardan kelip otyr. Jańa toptardyń ókilderi joq», - dedi Tumatov.
Eske sala keteıik, búgin, 16 aqpan kúni Sırııa ahýalyn retteýge baılanysty Astana protsesiniń aıasynda joǵary deńgeıde kezekti otyrys ótedi. Sırııadaǵy atysty toqtatýǵa kepildik berip otyrǵan Reseı, Túrkııa men Iran memleketteriniń xabarlaýynsha, otyrysta Sırııa jerinde áskerı is-qımyldy toqtatý rejimin saqtaý máseleleri, sonyń ishinde naqty terrıtorııalarda axýaldy turaqtandyrý jaıy sóz bolady degen jospar bar. Sondaı-aq birlesken shuǵyl top týraly ereje qabyldanyp, bitimgerlik rejimdi kúsheıtý jáne Jeneva kelissózderi aldyndaǵy basqa da sharalar talqyǵa salynbaq. Astanadaǵy kezekti kezdesýge Iordanııa Koroldigi, Sırııa Arab Respýblıkasy, sol jerdegi qarýly oppozıtsııanyń ókilderi, BUU Bas xatshysynyń arnaıy ókili S. De Mıstýra, sondaı-aq AQSh baqylaýshy retinde shaqyrylyp otyr. Buǵan deıin Sırııa máselesin retteýge arnalǵan Astana protsesinen keıin elordada xalyqaralyq texnıkalyq kezdesý ótken bolatyn. Sonyń nátıjesi boıynsha RF Qarýly Kúshteri Bas shuǵyl basqarma basshysynyń orynbasary, general-maıor Stanıslav Gadjımagomedov málimdeme jasaǵan bolatyn.
