Astana protsesi sırııalyq beıbit arhıtektýranyń bólshegine aınaldy - Staffan de Mıstýra
Otyrys barysynda Bas hatshynyń Sırııa jónindegi arnaýly elshisi Staffan de Mıstýranyń brıfıngi tyńdaldy. Bul jaıynda QR SІM baspasóz qyzmetinen málim etti, dep habarlaıdy QazAqparat.
Otyrysqa qatysýshylar 3-4 mamyr kúnderi Astanada ótken sırııaaralyq kelissózderge qoldaý bildirip, Astana protsesiniń birlesken saıası negizdeme izdeýge arnalǵan Jeneva tuǵyrnamasynyń tabysty bolýyna aıtarlyqtaı úles qosqandyǵyn atap ótti. Olardyń ortaq paıymynsha, Astanadaǵy kelissózder soǵysty toqtatý rejimin nyǵaıtyp, keńeıtýge, kúrdeli gýmanıtarlyq jaǵdaıdy sheshý joldaryn izdeýdi qamtamasyz etýge múmkindik berdi. Qazaqstandyq delegatsııa taıaýdaǵy Jeneva kelissózderine sırııalyq janjalǵa qatysýshy barlyq taraptyń qatysýyn quptady.
Qazaqstan Sırııa Arab Respýblıkasyndaǵy soǵysty toqtatý rejimin nyǵaıtý maqsatynda Reseı Federatsııasy, Túrkııa Respýblıkasy jáne Iran Islam Respýblıkasy qabyldaǵan sharalarǵa joǵary baǵa berdi.
Astana protsesine qatysýshy kepilger elderdiń jergilikti jerdegi jaǵdaıdy tereń biletindigi, barynsha kúrdeli ári názik jaǵdaıda taıtalasýshy taraptardy bir ústel basyna otyrǵyza alǵandyǵy atalyp ótildi.
Qazaqstan delegatsııasy Amerıka Qurama Shtattary men Iordanııa Hashımıttik Koroldigi baıqaýshylarynyń aǵymdaǵy jyldyń 3-4 mamyrda Astanada ótken sırııaaralyq kelissózderge qatysqany úshin rızashylyq bildirdi.
Qaýipsizdik keńesi músheleriniń basym bóligi, onyń ishinde Qazaqstan 2017 jyldyń 4 mamyrynda Astanada qol qoıylǵan Sırııada deeskalatsııa aımaǵyn qurý týraly memorandýmnyń qabyldanýyna qoldaý bildirdi. Qaýipsizdik keńesiniń birqatar múshesi deeskalatsııa aımaǵynyń qurylýy qazirdiń ózinde janjaldasýshy taraptardyń soǵys is-qımyldarynyń azaıýyna sebep bolǵanyn atap ótti.
Arnaýly elshi Staffan de Mıstýra Sırııada jalpyqamtymdy beıbitshilikke qol jetkizýdegi Astana protsesiniń rólin atap óte kele, Qazaqstan Prezıdenti Nursultan Nazarbaevqa jáne osy jyldyń 3-4 mamyrynda Astanadaǵy kelssózderdi joǵary deńgeıde uıymdastyrǵan elimizdiń Úkimetine aıryqsha alǵysyn bildirdi. Ol Astana protsesi óte kúrdeli jaǵdaıda turǵyzylyp jatqan sırııalyq beıbit sáýlettiń negizgi bóligine aınalǵandyǵyn basa aıtty. Reseı Federatsııasynyń delegatsııasy da Sırııa jerinde beıbitshilik pen tynyshtyqtyń ornaýy úshin kúsh-jiger jumsap kele jatqan Qazaqstannyń Memleket basshysy men halqyna shynaıy rızashylyqtaryn bildirdi.
