Astana protsesi: Sırııada áskerı is-qımyldar azaıyp keledi

ASTANA. QazAqparat - Sırııa máselesin retteý boıynsha Astanada ótken sońǵy kelissózder kezinde Reseı, Túrkııa men Iran memleketteri Sırııada tórt deeskalatsııa aımaǵyn qurý týraly memorandým rásimdegen bolatyn, dep xabarlaıdy QazAqparat tilshisi.

«Bizge túsken aqparatqa sáıkes, qazirdiń ózinde sol memorandým Sırııadaǵy jaǵdaıdy turaqtandyrýǵa óz septigin tıgizip otyr. Áskerı is-qımyldar azaıyp keledi. Menińshe, bul - qýantarlyq jáıt. Kepildik beretin memleketterdiń endigi maqsaty - osy oń úrdisterdi barynsha saqtap, ary qaraı damytý», - deıdi QR Syrtqy ister mınıstri Qaırat Ábdiraxmanov.

Aıta keteıik, búgin mınıstr Astanada Sırııa máselesi boıynsha kezekti kelissózderdiń ótetinin rastady. «Qazirgi kezde Reseı, Túrkııa men Iran óz arasyndaǵy konsýltatsııalardy belsendi túrde júrgizip keledi. Negizgi maqsat - Sırııa máselesin retteýge arnaǵan Astana protsesi aıasyndaǵy kelissózderdiń kezekti raýndyn belgileý. Reseıdegi áriptesterimiz ol kelissózderdi 12-13 maýsym kúnderi ótkizýdi qalaıtyndaryn jetkizdi. Ol jaıynda basqa da taraptarǵa xabarlaǵan. Kepildik beretin memleketter jaqyn kúnderi, bálkim, aldaǵy birneshe saǵattyń ishinde sol kezdesýdiń kún tártibin jarııalaıdy. Sol kezde qatysýshylardyń tizimi de belgili bolady», - dedi Qaırat Ábdiraxmanov búgin jýrnalısterge bergen suxbatynda.