Astana protsesi: Sırııa máselesine qatysty kezekti jıynda qandaı máseleler talqylanady

ASTANA. QazAqparat - Túrkııanyń Qazaqstandaǵy Tótenshe jáne ókiletti elshisi Nevzat Ýıanyk qazaqstandyq BAQ ókilderine arnalǵan brıfıng ótkizdi, dep habarlaıdy QazAqparat tilshisi.

Kezdesýde túrkııalyq dıplomat sırııalyq retteý boıynsha Astana protsesiniń 11-raýndynda talqylanýy tıis máselelerge toqtaldy.

«Astanadaǵy kelissózder - taraptar arasynda kelisimge qol jetkizilgen atysty toqtatý rejimin kúsheıtýge, zorlyq-zombylyqty azaıtýǵa jáne ózge de máselelerdi qarastyratyn úlken múmkindik. Sonymen birge, Astanadaǵy kezdesýde senim sharalaryn nyǵaıtý, ony Sırııa jerinde qoldaný jáne Idlıbtegi deeslakatsııa aımaǵynyń sharttaryna qatysty naqty sheshimge kelý máseleleri kóteriledi dep úmittenemiz», - dedi Nevzat Ýıanyk elshilikte ótken brıfıngte.

Sondaı-aq, elshi aldaǵy kezdesýde gýmanıtarlyq aspektidegi máseleler talqylanyp, naqty ýaǵdalastyqtar ornaýy tıis dep esepteıdi.

«Túrkııa Qazaqstan dıplomatııasynyń negizgi basymdyqtarynyń biri bolyp sanalatyn medıatsııa ınstıtýtyn óz elinde damytýdy qarastyrýda. ıAǵnı, Qazaqstan tájirıbesin úlgi retinde qaraımyz jáne keńirek damytý qajet», - dep óz sózin tolyqtyrdy Nevzat Ýıanyk.

Aıta keteıik, Sırııa qaqtyǵysyn retteýdegi Astana protsesiniń 11-raýndyn qarasha aıynyń sońynda nemese jeltoqsan aıynyń basynda ótkizý josparlanǵan.