Astana protsesi Sırııa halqynyń beıbit ómirge degen úmitin qaıta oıatty
Bul týraly búgin Astana protsesi úshinshi raýndynyń aıaqtalýyna oraı ótken brıfıngte QR Syrtqy ister mınıstriniń orynbasary Aqylbek Kamaldınov málim etti, dep habarlaıdy QazAqparat.
«Qazaqstan Respýblıkasynyń Prezıdenti Nursultan Nazarbaevtyń tolyq qoldaýymen jáne tikeleı atsalysýymen bastalǵan Sırııa boıynsha Astana protsesiniń úshinshi raýndy atalǵan eldegi atysty doǵarý rejimin nyǵaıtýǵa, sonymen qatar áskerı jáne gýmanıtarlyq máselelerdi talqylaýǵa baǵyttaldy. Kepildik berýshi memleketter Reseı, Túrkııa jáne Irannyń joǵary laýazymdy delegatsııalary Astana platformasynda osyǵan deıin áskerı salada qol jetkizilgen ýaǵdalastyqtardyń oryndalýy barysyn talqylap, Sırııadaǵy daǵdarysty retteý boıynsha úshjaqty ózara is-qımyldy nyǵaıtý joldaryn qarastyrdy», - dedi ol.
Onyń atap ótýinshe, Jeneva protsesiniń ajyramas bóligi bolyp tabylatyn bul kelissózder 6 jyl boıy qarýly qaqtyǵys zardabyn tartyp kele jatqan Sırııa halqynyń beıbit ómirge degen úmitin qaıta oıatqan.
«Qazirgi tańda halyqaralyq qoǵamdastyq Astana protsesine zor senim artyp, munda qol jetkizilgen ýaǵdalastyqtarǵa joǵary baǵa berýde», - dedi Kamaldınov.
Aıta keteıik, buǵan deıin Sırııa boıynsha Astanada protsesiniń birinshi kezeńi 23-24 qańtarda uıymdastyrylǵan bolatyn. Al 16 aqpanda kelissózderdiń ekinshi kezeńi ótken edi.
