Astana protsesi: Kepilger elder Sırııaǵa gýmanıtarlyq kómekti arttyrýǵa shaqyrdy

NUR-SULTAN. QazAqparat - Sırııa boıynsha Astana protsesinde kepilger elder halyqaralyq qaýymdastyqtardy, ásirese Birikken Ulttar uıymyn Sırııaǵa gýmanıtarlyq kómek kórsetý sharalaryn arttyrýǵa shaqyryp otyr, dep habarlaıdy QazAqparat tilshisi.

«Kepilger elder (Iran Islam Respýblıkasy, Reseı Federatsııasy men Túrkııa Respýblıkasy) aldyn ala shart qoımastan, Sırııa aýmaǵyndaǵy barlyq sırııalyqtarǵa gýmanıtarlyq kómek kórsetýdi jalǵastyrý kerektigin atap ótti. Halyqaralyq qaýymdastyqtardy, ásirese BUU men onyń gýmanıtarlyq agenttikterin halyqaralyq gýmanıtarlyq quqyqqa sáıkes, Sırııaǵa kómektesýge, gýmanıtarlyq tasymaldy kóbeıte otyryp, bazalyq ınfraqurylymdyq nysandardy - sý jáne elektrmen qamtý jelilerin, mektepter men aýrýhanalardy qalpyna keltirýge shaqyrdy», - dedi kepilger elderdiń birlesken málimdemesin oqyǵan QR Syrtqy ister birinshi vıtse-mınıstri Muhtar Tileýberdi.

Aıta ketsek, kepilger elderdiń birlesken málimdemesin oqyǵan Muhtar Tileýberdi Astana protsesine Irak pen Lıvııanyń qosylýy múmkin ekenin jarııalaǵan bolatyn. Eske sala ketsek, búgin elordada Sırııa boıynsha Astana protsesiniń 12-shi raýndy aıaqtaldy.