Astana protsesi: Kepilger elder birlesken málimdeme jasady

ASTANA. QazAqparat – Sırııa kelissózi boıynsha Astana protsesiniń 19-kezdesýi ótti. Kelissóz qorytyndysyna oraı kepilger elderdiń birlesken málimdemesin QR Syrtqy ister mınıstriniń orynbasary Ádil Tursynov jarııa etti, dep habarlaıdy QazAqparat tilshisi.

«Birinshi - 2022 jylǵy 19 shildede Tegeranda ótken Astana protsesiniń kepilger elderiniń úshjaqty sammıti aıasynda qol jetkizilgen ýaǵdalastyqtardy basshylyqqa ala otyryp, álemdegi jáne óńirdegi ahýaldy damytýdy qarastyryp, Sırııa daǵdarysyn ornyqty retteýdi ilgeriletýde Astana protsesiniń jetekshi rólin atap ótti. Ekinshi - Sırııa Arab Respýblıkasynyń egemendigine, táýelsizdigine, birligi men aýmaqtyq tutastyǵyna, sondaı-aq BUU jarǵysynyń maqsattary men qaǵıdattaryna óziniń ózgerissiz berilgendigin rastady jáne bul qaǵıdattardyń jalpyǵa birdeı saqtalýy men qurmettelýine jatatynyn atap ótti», - delingen Ádil Tursynov jarııalaǵan birlesken málimdemede.

Úshinshiden, onyń atap ótýinshe, taraptar terrorızmge qarsy kúrestiń barlyq nysandary men kórinisterinde ózara is-qımyldy jalǵastyrýǵa jáne Sırııanyń egemendigi men aýmaqtyq tutastyǵyna nuqsan keltirýge baǵyttalǵan ári kórshi elderdiń ulttyq qaýipsizdigine, onyń ishinde transshekaralyq shabýyldar men ınfıltratsııaǵa qaýip tóndiretin separatıstik josparlarǵa qarsy turýǵa bel býatynyn atap ótken.

«Tórtinshi - Idlıb deeskalatsııa aımaǵyndaǵy jaǵdaı egjeı-tegjeıli qarastyryldy. Gýmanıtarlyq ahýaldy qosa alǵanda, Idlıb deeskalatsııa aımaǵyndaǵy jáne onyń aınalasyndaǵy jaǵdaıdy turaqty qalypqa keltirýdi qamtamasyz etý úshin odan ári kúsh salýǵa kelisti. Idlıb týraly búkil kelisimdi tolyq oryndaý arqyly «jerde» tynyshtyqty saqtaý qajettigin atap ótti», - dedi ol.