Astana Pro Team veloshabandozy V.Anolı Katalonııa týrynyń alǵashqy kezeńinde máre syzyǵyn ekinshi bolyp kesti
ASTANA. 19 naýryz. QazAqparat - Astana Pro Team veloshabandozy Valerıo Anolı dúısenbi kúni bastalǵan Katalonııa týrynyń alǵashqy kezeńinde sprınttik teke-tireste máreni ekinshi bolyp qıdy. Ol Jerorta teńiziniń jaǵalaýynda belgilengen márege jeter aldynda sońǵy órge kóterilýde shabýylǵa shyǵyp, pelotonnan uzap ketken toptyń qatarynda bolǵan edi, dep habarlady komandanyń resmı saıty.
Áý basta, V.Anolıdiń kezeńde jeńiske talasýy josparlanbaǵan bolatyn. Ol Aleksandr Dıachenkomen birge komandanyń shtattyq sprınteri Andrea Gýardınıdiń máredegi sprınttik talasqa qatysýyna jaǵdaı jasap, pelotonnan uzap ketken topty qýyp jetýge jumys jasaýy tıis edi. Alaıda, márege 20 shaqyrym qalǵanda Caella-ǵa kóterilý kezinde peloton ekige bólinip, sprınterlerge tańdaý jasaý múmkin bolmaı qaldy.
«Shabandozdar toby qulaǵan sátte, Sky óz veloshabandozdaryna barynsha qoldaý kórsetip, olardyń qarqynyna ilese alǵan eki-úsh veloshabandozben birge alǵa umtyldy», - dedi Anolı.
«Ýıggıns, Rodrıges, Gesınk, Valverde - barlyǵy da taýly kezeńderde ózderin jaqsy sezinedi. Anolı osyndaı myqtylarmen talasqa túsip, oryn alǵan jaǵdaıdy eskere kelip, kezeń qorytyndysynda ekinshi orynǵa taban tiredi. Jaraısyń, Anolı!», - dedi Astana Pro Team sporttyq dırektory Dmıtrıı Sedýn.
Belgııalyq Djannı Meersman kezeń jeńimpazy atanyp, Ispanııanyń soltústiginde ótetin jeti kúndik velobáıgeniń jalpy esebinde kósh bastady.
»Meersman sońǵy 200 metrde maǵan qaraǵanda jyldam boldy. Degenmende, búgin tuǵyrda turǵanyma qýanyshtymyn. Komanda bıylǵy maýsymda maǵan úlken senim artty, sondyqtan jeńiske jetý - basty maqsatymyz. Tırreno-Adrıatıkodan keıin ózimdi jaqsy sezindim, Ispanııa báıgesinde taǵy bir ret óz múmkindikterimdi synap kórmekshimin. Erteńgi kezeńde de jeńiske talasamyz», - dedi V. Anolı.
