Astana Pro Team veloshabandozy B.Bozıch Parıj-Nıtstsa kópkúndiginiń dúısenbilik jarysynda úzdik ondyqqa ilindi

Áıtse de bul kórsetkish bonýstyq upaılardy ıelenýge jetkiliksiz boldy. Onyń komandalyq áriptesi Kevın Zeldraers márege 20 shaqyrym qalǵanda jaraqattanyp, aýrýhanaǵa jetkizildi, dep habarlady komandanyń resmı saıty.

Toptyq básekede Slovenııa chempıony degen ataǵy bar Bozıch, kezeń sóresine shyqqan sátte, jalpy eseptegi kórsetkishi boıynsha jeńimpazdan 3 sekýnd artta edi. Sondyqtan oǵan kezeń barysynda upaılyq bonýstarǵa qol jetkizip, márede jeńiske talasý mindeti qoıyldy.

«Jarys aldyndaǵy komanda jınalysynda Bozıch óz kúshin márege deıin saqtaýdy jón kórdi jáne onyń boljamy boıynsha jarys ortasynda sarapqa salynatyn upaılar pelotonnan uzap ketken topqa tıesili bolýy kerek bolatyn. Ol márege qolaıly pozıtsııada keldi, biraq 200 metrge ońǵa qaraı yǵysyp, máreni tek toǵyzynshy bolyp kesti. Al komanda sońǵy saǵatta onyń márege alǵashqylardyń biri bolyp kelýine jumys jasady», - dedi Astana Pro Team sporttyq dırektory Dmıtrıı Fofonov.

195 shaqyrymǵa sozylǵan kezeń jeńimpazy ataǵy Frantsııa chempıony Naser Býhanıge buıyrdy jáne ol jalpy esepte de kósh bastap, jeńimpaz jıdesine ıelik etti. Bozıch 3 sekýndtyq ýaqyt aıyrmashylyǵymen jalpy eseptiń on birinshi satysyna taban tiredi.

«Astana» komandasynyń belgııalyq veloshabandozy Kevın Zeldraers peloton basynda tizgindi qolǵa ustaǵandardyń biri bolatyn, ol kúni boıy pelotonnan uzap shyqqan topty qýyp jetýge ter tókti. Ókinishke oraı, joldyń tarylǵan bóliginde 200 sportshy biri-birine keptelip, Kevın jol boıyndaǵy plastıkalyq mejege soqtyǵysyp qulap qaldy.

«Sońǵy 20 shaqyrymda jarys joly óte qaýipti bolatyn, Qulaǵan 40 veloshabandozdyń ishinde Kevınniń de bolǵany ókinishti-aq, eki aıaǵynyń onyń tize tusy qatty tilinip ketken, san etiniń jyrtylǵany da anyqtaldy. Biraq ol velosıpedine qaıta otyryp, 8 mınýt aıyrmashylyǵymen márege jetti. Jarys aıaqtalysymen aýrýhanaǵa jetkizdik. Onyń erteńgi jarysqa shyǵý-shyqpaýy belgisiz» - dedi D. Fofonov.